Il CB Surses (3. liga) ha pers il gieu da 1/16-final da la prerunda da la cuppa svizra a chasa encunter il FC Eschenbach (3. liga) cun 2:4. L'emprim gieu da la cuppa svizra avevan ils da Surses che dattan en questa stagiun per l'emprima giada insuma en la 3. liga anc gudagnà ordaifer cunter il FC Littenheid, in club da 4. liga, cun 4:0.
Cuppa svizra
Ina runda vinavant è perencunter il CB Trun/Rabius (3. liga) ch'ha battì a chasa il FC Altstätten (3. liga) cun 4:3, quai suenter ch'il club dal chantun Son Gagl manava anc da pausa cun 3:1. Cunquai dattan ils Sursilvans l'entschatta october l'otgavelfinal da la prerunda da la cuppa svizra.
Clera terrada per USSI
L'aventura cuppa svizra n'ha betg cuzzà ditg per la meglra equipa da ballape en Surselva. L'US Schluein Glion ha pers l'emprim gieu da la prerunda tranter ils clubs da la segunda liga a chasa encunter il FC Herisau cun 0:3. Dumengia, ils 26 da settember, spetga il proxim gieu da campiunadi sin ils Sursilvans. Lura frunta l'USSI a chasa sin il FC Vaduz. Fin uss ha l'US Schluein Glion recaltgà be 2 puncts ord ils emprims quatter gieus da campiunadi en la stagiun 2020/21.
Cuppa svizra
Stretga terrada per Cuira 97
Cuira 97 ha stuì magunar la terza terrada en il 5avel gieu da campiunadi en la 2. liga interregiunala . Il club da la chapitala grischuna ha pers ordaifer encunter il SV Schaffusa cun 1:2. Actualmain sa chatta Cuira 97 sin il 9avel plaz da la tabella. Il proxim gieu da campiunadi dat Cuira 97 a chasa encunter il FC Weesen, quai la dumengia, ils 26 da settember.