Davent dals 12 da zercladur datti puspè da vesair gieus da campiunadi en las ligas d'amaturs da la Svizra orientala. Quai munta da la 2. liga interregiunala fin en 5. liga. Il medem vala per las ligas regiunalas da dunnas. Quai scriva la federaziun da ballape da la svizra orientala sin lur pagina d'internet. Uschia ha l'OFV gia fixà ils gieus davent dals 12 da zercladur per mintga equipa.
I vegn prendì suenter ils gieus da l'atun passà
L'atun passà ha la stagiun stuì vegnir interrutta abrupt pervia dal coronavirus. La finamira dal OFV è uss da prender suenter quests gieus da la stagiun 2020/2021. Sche ina mesa stagiun dal campiunadi è numnadamain dada, èsi – tenor reglament – pussaivel da quintar la tabella. Uschia vegni era a dar promoziuns e relegaziuns en tuttas ligas. I fa dentant prescha: Fin ils 4 da fanadur sto il campiunadi esser a fin. Fin fanadur cumenza numnadamain gia la stagiun 2021/2022 cun gieus da cup.
Tut tenor equipa datti grondas differenzas cons gieus ch'i han anc da dà. Intginas equipas han da prender suenter tschintg gieus da l'atun passà. Autras equipas n'han da dar nagins gieus pli questa primavaira. Tar ils gieus èn 300 aspectaturs lubids.