Gianna Klucker ch'è oriunda da Tumein viva oz a Turitg ed ha dapi l’onn 2019 giugà per las colurs dal FC Rapperswil-Jona. Quatter onns ha ella dà cun quell'equipa en la pli auta liga svizra da ballape. Uss ha ella dentant terminà ses engaschi. Differenzas cun il trenader sco era la nova filosofia dal club èn tranter auter motivs per quella decisiun.
Jau hai sentì ch'jau n'hai betg pli la medema vista sin il ballape sco il trenader.
La stad passada haja dà ina gronda midada: radund 13 giugadras han chalà u han stuì bandunar il club. Quasi tuttina bleras novas giugadras èn vegnidas engaschadas, intginas era da l'exteriur. Intginas da quellas giugadras novas survegnian tenor Gianna Klucker ina paja ed il club metta era a disposiziun abitaziuns.
Tenor la giuvna da Tumein saja quai bain in pass en la dretga direcziun, damai ch'i saja tut auter che usità che las dunnas che giogan en la Women's Super League, pia en la pli auta liga svizra, pon viver dal ballape. Mo per ella va quai savens a cust da giugadras ch'èn gia pli ditg tar il club. Dentant saja quai la fin finala era part da la professiunalisaziun.
Era sche la giuvna da 28 onns na sa sentiva l'ultim temp betg pli uschè bain tar il FC Rapperswil-Jona, saja quai tuttina stà fitg grev da prender la decisiun da chalar. «L'entira chaussa era fitg emoziunala», di ella.
Co vinavant?
Suenter quella decisiun stat gia la proxima greva dumonda avant porta: terminar dal tut la carriera da ballape u giugar vinavant en in'autra equipa? Respunder quella dumonda na possia Gianna Klucker en il mument anc betg.
Ussa, cun l'entir process da chalar a Rapperswil, hai jau decidì da prender ina giada in zic temp e guardar co e nua ch'i pudess ir vinavant.
Sco emprim giaudia ella uss il temp senza trenaments. Silsuenter guarda Gianna Klucker sin tge ch'ella ha gust. Plaschair vid il ballape haja ella anc adina. Forsa ves'ins la giuvna da Tumein perquai gia bainprest puspè insanua sin in plaz da ballape.