Anouk Vergé-Dépré e Joana Heidrich han procurà a Tokio per la 13avla medaglia olimpica da la delegaziun svizra. Il duo dal beachvolleyball ha gudagnà la partida per bronz, cunter las Lettonas Tina Graudina/Anastasija Kravcenoka cun 21:19 e 21:15.
Curt suenter la partida ha Anouk Vergé-Dèprè anc gì fadia da propi realisar lur victoria: Per la Svizra èsi l'emprima medaglia olimpica dal beachvolleyball da las dunnas insumma. Campiunessas olimpicas dal beachvolleyball daventan las Americanas April Ross e Alix Klineman. En il final han ellas battì las Australianas.
