A Peking èn dapi las 14:51 temp svizzer ils 24avels gieus olimpics d'enviern averts. Il pled d'avertura ha il president da la China XI Jinping tegni. Envidà il fieu olimpic han la curridra da passlung Dinigeer Yilamujiang e l'atlet da cumbinaziun nordica Zhao Jiawen.
One World – One Family
Durant la ceremonia d'avertura cun ina show plain colurs ed il motto «One World - One Family» ha la China empruvà da sa preschentà sco pajas modern, avert e paschaivel dentant era nunimpressiunà da la critica envers la violaziun dals dretgs umans.
Il president dal Comité olimpic internaziunal IOC, Thomas Bach, ha engrazià a la China da manar tras ils gieus, malagrad la pandemia. La China saja uss era in pajais da sport d'enviern ed il pievel chinais possia vesair e sentir era quest entusiassem. Il president dal comité d'organisaziun, Cai Qi, ha drizzà ses pled ad atletas ed atlets ed era al president da la China. Ils gieus olimpics duaian far ina punt tranter las culturas ed el appelescha a la solidaritad durant ils gieus en temp da la pandemia.
Uss daventa voss siemi olimpic realitad
La delegaziun svizra è vegnida menada da la skiunza Wendy Holdener e dal hockeyan Andres Ambühl en il stadion naziunal. Els han gì l'onur da purtar la bandiera svizra.
Durant duas emnas vegn cumbattì a Peking e regiun per medaglias olimpicas en 109 differentas occurrenzas. A la partenza van bunamain 3’000 atletas ed atlets da l’entir mund, tranter quels er 168 svizzers.
