Siglir tar il cuntegn

Header

audio
Skis: Daniele Sette sto puspè far tut sez
Or da Actualitad dals 05.05.2023. Maletg: Keystone
laschar ir. Durada: 3 minutas 32 Secundas.
cuntegn

Betg pli en il cader Daniele Sette sto puspè far tut sez

Suenter quatter onns è il skiunz engiadinais Daniele Sette crudà or dal cader C da la federaziun svizra da skis, Swiss Ski. Enstagl da metter ils skis da la vart ha el decis da cuntinuar cul sport sta skis. Sco avant ses temp tar Swiss Ski è el puspè part da la squadra privata Global Racing Team.

La carriera dal skiunz Daniele Sette da San Murezzan è unica. Blers onns ha il skiunz da 31 onns fatg bler sulet. El era atlet, trenader, um da service e magari er expert da communicaziun e marketing per finanziar ses sport. Pir en la vegliadetgna da 28 onns ha la federaziun svizra da skis, Swiss Ski, prendì il skiunz da San Murezzan en il cader C. Quatter onns era el uss part da quest cader. Las prestaziuns sportivas durant l’enviern passà eran dentant massa flaivlas, uschia che Swiss Ski ha bittà a Daniele Sette or dal cader.

audio
Daniele Sette cuntinuescha sia carriera en in team privat
ord Actualitad dals 05.05.2023. Maletg: RTR
laschar ir. Durada: 3 minutas 32 Secundas.

Nov cumenzament al vegl lieu

Enstagl da terminar sia carriera ha Daniele Sette decis: uss pir da dretg. El n'ha anc betg pudì mussar quai ch’el è bun da prestar, perquai era per el dalunga cler ch’el emprova da sa preparar e da sa recumandar per cursas da la cuppa mundiala sco part dad in team privat. Sco gia avant che Daniele Sette è vegni promovì en il cader C da Swiss Ski è el sa collià cun la squadra Global Racing Team. Ina squadra ch’è vegnida fundada avant in decenni bel ed aposta per atletas ed atlets che n’ha survegnan betg in status da cader naziunal. L’equipa porscha da cundiziuns da trenament professiunalas ed offra tut quai ch'ins dovra per far sport da skis sin livel professiunal.

I tutga tar ina carriera da skis che betg tut va adina perfetg e che i dat fasas pli difficilas
Autur: Daniele Sette skiunz professiunal da San Murezzan

Finanziar sez la stagiun

Ina da las consequenzas da betg pli esser part dad in cader da Swiss Ski è sa chapescha er che Daniele Sette ha da finanziar uss sia stagiun sulet. Ensemen cun ses sponsurs ha el dentant buns partenaris che vegnan a sustegnair el er en il futur. Impurtant resta vinavant da sa preparar bain sin il proxim enviern e dad ir vinavant a la partenza da cursas da la cuppa mundiala da skis.

RTR actualitad 07:00

Artitgels legids il pli savens