Cun quatter sbagls da sajettar è Lena Häcki stada la meglra svizra. Il grond trumf svizzer n'ha dentant er gì nagina schanza e terminà la cursa sco 24avla. Amy Baserga ha cun 5 sbagls da sajettar cuntanschì be il 69avel plaz.
Gudagnà aur ha la Tudestga Denise Herrmann. La biatleta da 33 onns aveva anc gudagnà il 2014 a Sotschi bronz en il passlung, quai cun la staffetta tudestga. En vista a la stagiun 2016/2017 ha ella lura midà dal passlung tar il biatlon. Il 2019 era Herrmann gia daventada campiunessa mundiala da biatlon.
Las medaglias:
- Denise Herrmann (GER) 44:12.7
- Anais Chevalier (FRA) + 9,4 sec.
- Marte Röiseland (NOR) + 15,3 sec.
Selina – la suletta sora Gasparin a Peking
Parter als gieus olimpics cun las duas soras Elisa ed Aita Gasparin ed er cun ses um Ilya Chernousov è stà il siemi da Selina Gasparin. Igl è dentant vegnì tut auter. La pioniera dal biatlon en Svizra è uss suletta a Peking.
Durant che las soras Elisa ed Aita Gasparin han manchentà la qualificaziun per quest punct culminant è Selina gia per la quarta giada da la partida suenter Vancouver il 2010, Sotschi il 2014 e Pyeongchang il 2018. Ils gieus olimpics da Peking èn dentant er in prender cumià da la tribuna olimpica per la biatleta da 37 onns.
Cursa singula e staffetta
Selina Gasparin ha stuì tremblar ditg per sia selecziun. Sia stagiun saja stada catastrofala, er perquai ch’ella saja stada malsauna quasi durant l’entira preparaziun, uschia Gasparin. Tuttina hai tanschì per Peking. Gasparin è gia partida a la cursa singula da 15 kilometers. En questa disciplina aveva ella gudagnà a Sotschi sensaziunalmain la medaglia d’argient. Quella giada hai be tunschì per il 62avel rang. Il punct culminant è dentant la cursa da staffetta. Là vulan las Svizras cumbatter per ina medaglia, er sch’ils buns resultats han mancà ils davos mais.