La preparaziun sin ils campiunadis mundials da giuventetgna a Shchuchinsk en il Kasachstan è stada tut autra ch'optimala. En schaner da quest onn ha Alessia Laager da Samedan fatg part al festival olimpic da giuventetgna en l’Italia. Suenter las cursas a Forni Avoltri ha la biatleta da 18 onns vulì cuntinuar cun cursas da la coppa IBU ed alura ir vinavant als campiunadis mundials da giuventetgna en il Kasachstan.
Per ils trenaders è quai dentant stà da memia. Uschia han els decidì da betg laschar prender part Alessia Laager a las cursas d'IBU suenter il festival olimpic da giuventetgna e perquai nominar ella per ils campiunadis mundials.
Emprima medaglia internaziunala
La decisiun da betg far part a las cursas d'IBU suenter il festival olimpic, e perquai da sa concentrar sin ils campiunadis mundials, era gista. Alessia Laager ha uschia pudì ir repussada als campiunadis mundials ed là ha ella mussà sia meglra prestaziun fin uss. En la cursa singula sur 10 kilometers è ella vegnida segunda ed uschia vice campiunessa mundiala en la categoria da giuventetgna.
L’emprim in sbagl, alura dentant tutgà mintga schiba
Cumenzà ha la cursa d'Alessia Laager cun in sbagl en il stan da trair. Suenter ha ella dentant tutgà mintga culp. Quai era alura er il recept per il success e per la medaglia d’argient. Vegn vitiers che ella ha pudì currer davent da l’entschatta cun ina fitg buna concurrenta. A la fin è resultà la medaglia. Segir il pli grond success en la giuvna carriera d'Alessia Laager.
