Dapi ses debut en la cuppa mundiala, il november 2005 ad Östersund, vala Selina Gasparin sco la pioniera dal sport da biatlon en Svizra. Uss è la Grischuna sa decidida da sa retrair suenter ses quarts gieus olimpics e 12 participaziuns a campiunadis mundials. Suenter quests gieus olimpics vesia ella il temp sco ideal per chalar sia carriera sco biatleta.
A mai vegnan a restar en memoria numerus muments fantastics, nunemblidaivels, sin sco er dasper loipa e stans da tir. Jau guard perquai enavos cuntenta sin mia carriera e ma legrel ch'jau hai pudì esser prest 20 onns part dal svilup da quest sport en Svizra.
Ella engrazia en la communicaziun da Swiss Ski er a tuts e tuttas che han insacura sustegnì ella durant quels onns ed atras buns e betg uschè buns temps che la dunna da 37 onns ha passentà.
Lunga carriera
Suenter sia midada dal passlung al biatlon, l'onn 2004, ha Selina Gasparin procurà per intgin crap da miglia en il sport d'enviern svizzer. Sco emprim è ella stada intgins onns l'unica Svizra en la cuppa mundiala. En la stagiun 2013/14 ha ella lura procurà per las emprimas victorias en il sprint a Hochfilzen e Le Grand-Bornand e cun quai per las emprimas victorias en il biatlon per la Svizra insumma. Dus mais pli tard ha ella pudì festivar ses pli grond triumf da sia carriera, cura ch'ella ha fatg argient as gieus olimpics a Sotchi, sur ils 15 kilometers e quai senza in sbagl da sajettar. Questa medaglia d'argien è fin oz la suletta per la Svizra en il biatlon.
En tut ha la mamma da dus uffants fatg quatter plazzas da podest en la cuppa mundiala. Plinavant è ella stada part dal quartet svizzer che ha gudagnà il 2019/20 ils emprims trais plazs da la cuppa mundiala d'ina staffetta da dunnas.
Sustegnì ferm il svilup dal sport en Svizra
Sco represchentanta dal sport da biatlon svizzer ha Selina Gasparin er sustegnì il svilup da la Roland Arena a Lai, l'emprim stabiliment da biatlon svizzer ch'è fatg per cursas da la cuppa mundiala internaziunala. Uschia è ella stada represchentanta per la candidatura dals campiunadis mundials da biatlon a Lai il 2025.
Sia ultima cursa sco atleta activa, ha Selina Gasparin l'entschatta avrigl al campiunadi svizzer a Realp.
