Suenter 17 onns terminescha il biatlet da Trin Serafin Wiestner sia carriera. Il final da la cuppa mundiala la proxima fin d'emna ad Oslo vegnan ad esser las davosas cursas internaziunalas per l'atlet da 32 onns. Suenter suondan anc ils ils campiunadis svizzers avant che dar adia. Quai ha el communitgà sin ses chanal dad Instagram.
Duas giadas a gieus olimpics
17 onns ha sia carriera da biatlon cuzzà, en quels è Serafin Wiestner stà duas giadas a gieus olimpics, quai il 2014 a Sotschi ed il 2018 a Pyeongchang. Ses meglier plaz olimpic è stà in novavel en il sprint da 10 kilometers. Per ils gieus olimpics da l'onn passà a Beijing n'è el betg stà qualifitgà. En la cuppa mundiala èsi mai reussì a l'atlet da Trin da far ina plazza da podest. Ses meglier plaz è stà in tschintgavel en la stagiun 2015/2016 en in sprint. Per ina plazza da podest hai dentant tanschì per Wiestner en la staffetta maschadada cun Elisa ed Aita Gasparin als campiunadis europeics 2022 ad Arber en Germania.