Siglir tar il cuntegn

Header

cuntegn

Biatlon Soras Gasparin vulan ir sin il podest

Ad Östersund en Svezia ha cumenzà la davosa fin d’emna la nova stagiun da biatlon. En bun duas emnas spetga lura gia l’emprim punct culminant da la stagiun sin las biatletas ed ils biatlets svizzers. Mez december vegn organisà per l’emprima giada insumma cursas da la cuppa mundiala en Svizra, quai en l’Arena da biatlon a Lai.

audio
Biatlon: Aita ed Elisa Gasparin han il podest en mira
ord Actualitad dals 28.11.2023. Maletg: Keystone
laschar ir. Durada: 3 minutas 21 Secundas.

Ina stagiun tut speziala

Per Aita ed Elisa Gasparin èn las cursas a Lai cursas quasi avant l’isch-chasa. Gugent cumbattessan ellas là per in plaz da podest, cunzunt en la cursa da staffetta. En questa disciplina èn ellas gia stadas trais giadas sin il podest, quai anc ensemen cun la sora gronda Selina Gasparin durant la stagiun 2019/2020. Dapi lura n’èsi però mai pli gartegià da cuntanscher in plaz sut las top 3. Quai duai uss sa midar, di Elisa Gasparin. Ed ella è er persvadia ch’i gartegia en questa stagiun cun quest podest, quai anc ensemen cun Lena Häcki-Gross e la nova staila svizra da biatlon, Amy Baserga. Sper las cursas a Lai valan ils campiunadis mundials il favrer a Nove Mesto en la Tschechia sco grond punct culminant da la stagiun 2023/2024.

Elisa cun blessuras – Aita cun nov material

Tant Aita sco er Elisa Gasparin èn en mintga cas prontas per la stagiun da biatlon, er sch’ellas han gì ina preparaziun in zic speziala. Entant ch’Elisa ha gì da cumbatter cun problems da sanadad ha la sora giuvna Aita stuì s’endisar vi dal nov material. Suenter blers onns sin skis da Rossignol ha ella midà tar Salomon. Quai haja duvrà curaschi e saja ina gronda midada, ma ella saja fin uss fitg cuntenta d’avair fatg quest pass, uschia Aita Gasparin.

RTR actualitad 07:00

Artitgels legids il pli savens