Cun grondas ambiziuns è Fadri Barandun da Samedan partì en questa stagiun da bike. Il sportist da Samedan ha anc ina giada intensivà sia preparaziun ed è sa concentrà pli fitg sin sia carriera da bike. Al cumenzament da la stagiun che s’inclina ha el pudì realisar bunas cursas. El era a la partenza da cursas regiunalas, dentant er d'ina cursa da la cuppa mundiala da mountainbike e tar la cursa da pliras etappas dal Transalp da l’Austria fin tar il Lai da Garda. Il punct culminant da la stagiun 2024 vess alura stuì esser il Swiss Epic, la cursa da pliras etappas en il Grischun. Fadri Barandun e ses partenari d’equipa Simon Vitzthum èn ids plain aspectativas en questa cursa.
Acziun betg «faira» a l’entschatta dal mal
Top motivà e plain aspectativas èn Fadri Barandun e Simon Vitzthum partids en il Swiss Epic. L’emprima etappa da la seria da cursas era l’etappa da chasa da Fadri Barandun cun partenza ed arrivada a La Punt. Fin sin ils ultims meters ha l’equipa cun Barandun e Vitzthum cumbattì per la victoria. Alura hai dà sin ils ultims meters da la cursa ina collisiun cun ils adversaris e la cursa è ida a fin cun la segunda plazza. Quella dischillusiun era sco l'entschatta d'insatge che vegn a finir mal. Durant la cursa è Fadri Barandun vegnì malsaun, uschia ch’el n’ha betg pudì terminar il Swiss Epic. Fiss l’infecziun cun corona vegnida be dus u trais dis pli tard, alura fiss ina plazza da podest senz’auter stada realistica.
Experientschas da la stagiun sco motivaziun per il futur
Tuttina è Fadri Barandun puspè sa recreà da l’infecziun da corona ed el po puspè trenar sin aut livel. La stagiun da bike ha el terminà. L’emprim ha el puspè vuli daventar dal tuttafatg sauns avant da returnar sin il velo. Uss sa el propi tge ch'i dovra per esser uschè bain preparà sin il punct culminant da la stagiun sco avant il Swiss Epic 2024. Ed el è persvadi da puspè pudair cuntanscher quest livel.