Dapi otg onns fa Vital Albin part a l’equipa da Ralph Näf, il Thömus maxon Team, ed è uschia collega d’equipa da Mathias Flückiger, Lars Forster ed Alessandra Keller. Questa equipa è la segunda famiglia da Vital Albin, cun ses 27 onns il giuven dal team, dentant er gia cun ina gronda experientscha. Cun Thömus è il mountainbiker oriund da Tersnaus cunzunt da viadi a las cursas ed als camps da trenament.
Be pli 800 enstagl 1000 uras trenament
La gronda part dal trenament absolva Vital Albin sulet, il pli savens en la regiun da Cuira nua ch’el è dapi onns dachasa. Avant dus onns ha Albin engaschà in nov trenader, l’anteriur profi Dennis van Winden ch’ha dentant er fitgà pe en la scena da mountainbike.
L’Ollandais metta ensemen per Vital Albin il plan da trenament, emna per emna. Oz treneschia el bun 20% pli pauc ch’anc avant intgins onns, persuenter sajan ils trenaments pli effectivs e da meglra qualitad, di Vital Albin ch’ha en vista a la nova stagiun anc ina giada pudì far in pass enavant. Quai vul el uss cunzunt er mussar cun buns resultats en la cuppa mundiala.
Sut il nov trenader Dennis van Winden trenesch jau pli pauc, però cun dapli qualitad. Oz èn quai in zic dapli che 800 uras ad onn.
Ils cudeschs èn uss d’in maun
La stad passada ha Vital Albin terminà ses studi da giurisprudenza. Il bachelor ha el uss en satg, il focus è dapi lura cumplettamain sin il sport. Suenter sia carriera è il plan lura d’anc far il studi da master a l’Universitad da Turitg per silsuenter pudair far carriera sco giurist. Dasper il trenament nizzegia Vital Albin oz cunzunt il temp liber per sa recrear, in punct central per avair success. Ma profi sajan ins 24 uras a di, set dis ad emna, uschia Vital Albin.
Dasper il trenament datti anc blera lavur, saja quai cun organisar, planisar, schubregiar ils velos, cuschinar – tut chaussas che Vital Albin vul far uschè perfetg sco pussibel. En il temp liber che resta legia Vital Albin gugent, la stad va el magari a pestgar e l’enviern a parasgular.
Il cumenzament da matg cumenza la nova stagiun da mountainbike, quai en la Corea dal Sid. Sin il program spetgan nov cursas da la cuppa mundiala. Far furora vul Vital Albin cunzunt la fin matg a Nove Mesto en Tschechia, in percurs che giascha e plascha fitg bain ad el, lura mez zercladur a la cursa da chasa a Lai ed al campiunadi mundial ch’è quest onn la fin d'avust a Val di Sole en l’Italia.
Mia finamira è da finalmain ina giada cuntanscher in plaz sut ils top tschintg en ina cursa da la cuppa mundiala da cross country.
La preparaziun per questa stagiun saja stada fitg buna, el haja adina pudì trenar bain ed er adina giuadora pervia da la mancanza da naiv. Uschia na saja el mai stà sin la rolla en chasa, di Vital Albin. Il schaner ha il Lumnezian er fatg part ad in camp da trenament cun la squadra naziunala svizra a Gran Canaria, quai gia per la otgavla giada. Il favrer hai lura anc dà in segund camp da trenament da trais emnas a Girona en Spagna. Là ha el trenà ina part cun l’equipa naziunala ed ina part cun ses team da Thömus.
Dals 15 fin 19 d’avrigl sa participescha Vital Albin al Tour du Loir-et-Cher, ina cursa da via cun tschintg etappas fin a 200 kilometers amez la Frantscha. Ina cursa sumeglianta al Tour de Suisse. Questa cursa nizzegia Vital Albin sco in dals davos dirs blocs da trenament en vista a la stagiun da la cuppa mundiala da mountainbike.
La meglra tactica d’evitar accidents en las cursas da via è dad esser a la testa.
Dapi intgins onns emprovan adina dapli mountainbikers dad er far carriera cun il velo da via. Quai na vegnia però betg en dumonda, di Vital Albin che trenescha dentant bun la mesadad sin il velo da via. I sajan entant dus differents sports. Sin via gioga cunzunt er la tactica e la tecnica dad ir en gruppa ina rolla centrala. El n’haja betg il desideri da far questa midada ed el na vesia er betg ch’el haja las qualitads per far ina carriera sin via.
Vital Albin vul restar fidaivel a ses sport preferì, il mountainbike, ch’el ha cumenzà gia sco giuven buobet a Tersnaus en Lumnezia.