Per l’emprima giada han in per entusiasts da velo organisà en l’Africa dal Sid ina cursa da pliras etappas cun il velo da gravel. Quai è ina sort velo da via, cun rodas pli grossas per ir sin vias champestras. La cursa ha manà las curriduras ed ils curridurs dal vest dal cap da l’Africa da Knysna sur Blauuwater fin tar Shamwari. Sin quest viadi han las curriduras ed ils curridurs stuì superar stgars 800 kilometers. Il punct aut da la cursa è stà durant la quarta etappa il Korn Pass cun passa 1’800 meters autezza.
Violanta Rominger da l’Engiadin'Ota ha prendì en mira exact questa cursa. Gia adina ha ella vulì far viadi en l’Africa dal Sid. Ed uss, nua ch’ella ha savì cumbinar ses giavisch cun la passiun dad ir cun il velo è la cursa dal Gravel Burn vegnida sco clomada. Minuziusamain è la sportista che lavura en la partiziun da communicaziun dal Club da hockey da Tavau sa preparada sin questa aventura. Dapi emnas ha ella suttamess tut al siemi da far part a la cursa e quai cun success. Violanta Rominger ha gudagnà il classament general en sia categoria da vegliadetgna. La ciclista ha duvrà per las set etappas dal Gravel Burn 28 uras, 42 minutas e 29 secundas. Violanta Rominger è uschia stada bundant trais minutas pli svelta che la segunda Jenna Borrill da l’Africa dal Sid.
Prevista sin la cursa
Dapi il cumenzament da l'onn trenescha l'Engiadinaisa, Violanta Rominger (35 onns) mintga mument liber per la cursa «Nedbank Gravel Burn» en l'Africa dal Sid. Questa cursa ha lieu per l'emprima giada ed è ina cursa cun velos da gravel. Quai vul dir, cun questa sort da velos da cursa ins po er ir sin vias e sendas champestras.
Per sa preparar optimalmain sin la cursa en l'Africa dal Sid trenescha Violanta Rominger sis dis l'emna – tschintg dis sin il velo ed in di fa ella trenament da forza.
Fascinaziun per il sport e per l'Africa
Per l'Engiadinaisa che lavura e stat a Tavau, è il «Nedbank Gravel Burn» dapli che be ina cursa. I saja er in siemi che va en vigur.
Schont sco pitschna matta vuleva ella adina ir a visitar l'Africa. Ch'jau poss far ussa quai cun il velo e quai tar ina cursa che betg mintgin fa, è grondius.
Trenament intensiv e nutriment tenor plan
Per sa preparar optimalmain sin la cursa che cumenza la dumengia trenescha Violanta Rominger passa 12 uras l'emna. Quai tut sper in pensum da lavur da 100%.
Cler, mintgatant manca la motivaziun da trenar. Lura ma stoss jau adina puspè trair endament, pertge che jau pigl sin mai tut quests sforzs.
Er il nutriment ha ella adattà. Dapi questa stad lavura ella ensemen cun in'experta da nutriment. Uschia sa nutrescha Violanta Rominger tenor in plan da menu ed uraris fixads. I saja in plan da menu variond ed ella n'haja betg l'impressiun da stuair desister d'insatge.
La sonda poss jau perfin mangiar ina pizza. Era sche quella gusta, sent jau ch'ella na ma fa betg uschè bain.
La finamira – arrivar a la destinaziun
Violanta Rominger ha gia pliras giadas fatg turas da velo sur set dis e dapli. Ma far quai en il modus da cursa, saja insatge nov. In tschert respect saja qua e la pli gronda sfida sajan las atgnas pretensiuns. La finamira è numnadamain clera, far tut las set etappas e quai entaifer in temp adequat.