Il maraton da velo engiadinais ha patì da l'aura oz. La cursa roiala dad oz, sur 117 kilometers ed ils Pass dal Flüela e da l’Alvra, n'ha betg gì lieu. Gia baud oz en damaun han ils organisaturs dal maraton da velo decidì d'annullar la cursa. Uschia a quai be dà il venderdi il prolog da la cursa ed ier la cursa «La Cuorta», che Andrin Züger e Janine Meyer an gudagnà. Sportists trumpads da la sditga pon spetgar insatge tenor il directur dal maraton da velo engiadinais, Flurin Bezzola.
Sco remuneraziun datti forsa in bun per la participaziun a la cursa da l’onn proxim. Quai sto ins dentant anc sclerir. Uss vai per infurmar e per rumir si.
Andrin Züger e Janine Meyer gudognan «La Cuorta» dal Radmarathon
Andrin Züger da Favugn repeta sia victoria tar la cursa «La Cuorta» dal maraton da velo engiadinais. El gudogna en il sprint avant Rico Bogen e Leonard Hofer. Tar las dunnas è Janine Meyer la pli sperta.
-
Bild 1 von 4. Andrin Züger en l'arrivada. Bildquelle: RTR.
-
Bild 2 von 4. Bildquelle: RTR.
-
Bild 3 von 4. Bildquelle: RTR.
-
Bild 4 von 4. Andri Taisch da Zernez suenter la cursa. Bildquelle: RTR.
Passa 800 ciclistas e ciclists sa mesiran tar las differentas cursas dal Engadin Radmarathon. Suenter in prolog spetga l’emprim la cursa «La Cuorta» sur 97 kilometers en ils pass dal Fuorn, la Forcola di Livigno ed il Bernina. Lura suanda anc la cursa «La Svizra» sur 117 kilometers en ils pass dal Flüela e l’Alvra.
Andri Taisch da Zernez è in dals pacs indigens che fa gest omadus cursas. Suenter l’emprima cursa è el stà fitg cuntent e cun plaschair sa prepara el uss sin la segunda cursa la dumengia.
Prevista sin il Engadin Radmarathon
Las cursas dal maraton da velo engiadinais mainan l’emprim sur ils pass da la Forcola di Livignio e dal Bernina, e suenter sur ils pass Flüela ed Alvra. Sin omaduas rutas datti actualmain gist in per plazzals da fabrica. Totalmain set fabricas han las ciclistas ed ils ciclists da passar.
Quai ch’è per las sportistas ed ils sportists in siemi è per ils organisaturs mintg’onn ina gronda sfida. Perquai dovri bler precauziun durant l’inspecziun, ed alura er durant l’organisaziun dal traffic sin ils plazzals da fabrica. Tut tenor sco ch'il plazzal da fabrica sa preschenta han cadets da traffic da far vegnir la cursa pli plauna, d'avertir davart privels eventuals e da reagir cun experientscha sch'i dat problems. Durant las cursas da l'Engadin Radmarathon fan quai cadets da traffic scolads cun ina licenza.
In'ulteriura sfida è er adina da reglar il traffic da la cursa ensemen cun il traffic ordinari ch’è sin via la fin d’emna sin ils pass dal grischun dal sid. Ins emprovia da dar a la cursa da velo la precedenza, ma adina na saja quai dentant betg pussibel.
2 cursas cun prolog:
- Prolog: 7 km (venderdi, be en cumbinaziun cun ina da las cursas)
- «La Cuorta»: 97 km (sonda)
- «La Svizra»: 117 km (dumengia)
1'367 (La Cuorta) e 2'815 (La Svizra) meters d'autezza
1'000-1'400 participantas e participants sur l'entira fin d'emna
80% umens e 20% dunnas
ca. 200 voluntarias e voluntaris
«Retg u Regina da las muntognas» sco premiaziun speziala: Sin mintga pass datti puncts per questa rangaziun speziala ed ils dus u las duas primas sin ils pass survegnan mintga di in tricot.
«Il e la meglra Engiadinais/Engiadinaisa» survegn in premi spezial.
Pocal sco premi principal.
Dapi blers onns s’inscuntran amis dal velo da via adina l’emprima fin d’emna dal fanadur a Zernez per las cursas da l'Engadin Radmarathon. Sur blers onns è la cursa s'etablida. En il cor da las alps, amez las rutas sur ils pass dal Bernina u il pass da l’Alvra, il pass dal Flüela u il pass dal Fuorn cumbattan velocipedistas e velocipedists per il titel dal retg u la regina da l'Engadin Radmarathon.
L’idea a l’entschatta era da cumenzar pli baud la stagiun
Al principi da l’istorgia da l'Engadin Radmarathon è stada l’idea da cumenzar pli baud cun la stagiun. Gia l’entschatta da fanadur vulev’ins dar in stumpel economic a la regiun cun attrair ciclistas e ciclists che san far cursas sur ils pli populars pass da las alps. Da surventscher ina giada il pass dal Bernina u il pass dal Flüela cun il velo è il siemi da bleras velocipedistas e velocipedists. Uschia è naschida l’idea da porscher cursas da velo sur quests pass.
Suenter bunamain dus decennis sa participeschan mintg’onn circa 800 sportistas e sportists a las differentas cursas da l'Engadin Radmarathon. Il program cumenza cun in prolog, lura seguan la fin d’emna la cursa «La Cuorta» sur 97 kilometers davent da Zernez via Ova Spin, la Forcola di Livigno ed il pass dal Bernina enavos a Zernez. E la dumengia lura la cursa roiala sur 117 kilometers davent da Zernez sur ils pass dal Flüela e da l’Alvra.
Spetgà svieuta da circa in milliun francs
L’organisaziun da las trais cursas durant trais dis custa radund 180’000 francs. Sche tut va bain, alura duai la cursa generar ina svieuta da radund in milliun francs en la regiun. Era sch'i vegn adina pli difficil da chattar sponsurs che sustegnan la cursa, porta ella tuttina ina massa a la regiun. Hotels plains, restaurants e fatschentas da sport che profiteschan da las sportistas e dals sportists. E betg l’ultim era il num da Zernez, sco «Mecca» dal sport da velo durant ils mais da la stad.