Atletas ed atlets mussan mintgamai durant duas rundas à 60 secundas ils pli blers e megliers trics pussibels sin il bmx, in velo pitschen cun rodas pitschnas ed in sez che giascha quasi sin la roda davos, quai en in parc cun segls e mesapipas e chanals, sumegliant ad in skatepark. Ina giuria dat lura puncts per ils megliers trics, ils trics ils pli spectaculars, ils pli originals, per la meglra tecnica, stil e variaziun. Da tut ils participants e participantas cumbattan la finala ils megliers 12 en il final per las medaglias.
La suletta svizra a la partenza è Nikita Ducarroz, la sportista da 26 onns svizra-americana. Ella è dentant cupitgada en l’emprim percurs da la qualificaziun ed ha sco 13avla manchentà il final. Per Ducarroz, che aveva tranter auter gudagnà il 2021 bronz als gieus olimpics a Tokyo ed ils davos dus onns mintgamai argient al campiunadi mundial, ina gronda trumpada. Schanza da far revantscha survegn Ducarroz en in onn als proxims gieus olimpics a Paris.
