Siglir tar il cuntegn

Header

Legenda: Keystone
cuntegn

Brünig Giger gudogna Brünig, Orlik tschintgavel

La lutga da muntogna sin il Brünig è l’emprim inscunter dals ‘gronds’ dal sport da lutga da questa stagiun. En la stupenta culissa dal pass che collia ils chantuns Sursilvania e Berna han ils megliers 120 lutgaders cumbattì per il titel.

In mais avant ch'i vegn ad Interlaken a l’inscunter dals megliers lutgaders da la Svizra per curunar il retg da la festa dad Unspunnen è quai vegnì sin il Brünig a l’emprim duel dals megliers atlets da questa stagiun. 120 lutgaders da las federaziuns da Berna, da la Svizra Centrala e da la Svizra dal Nordost han cumbattì per la victoria prestigiusa da la lutga da muntogna. Radund trenta lutgaders cun cranz federal eran da la partida. Tranter quels er ils gronds favurits, Joel Wicki, Samuel Giger, Fabian Staudenmann, Armon Orlik, Domenic Schneider e Pirmin Reichmuth.

Samuel Giger gudogna sin il Brünig

Samuel Giger è partì cun in pari encunter Fabian Staudenmann. Silsuenter ha il lutgader da la federaziun NOS gudagnà tut las ulteriuras lutgas. Giger mussa uschia da moda e maniera impressiunanta ch’el vegn adina meglier en furma en vista al punct culminant da questa stagiun, la festa da lutga dad Unspunnen la fin dad avust. Per l’emprima giada dapi 17 onns gudogna cun Samuel Giger puspè in lutgader da la federaziun da la Svizra dal Nordost la lutga sin il Brünig.

Armon Orlik cun buna prestaziun, Joel Wicki cun ferida

Gia en l’emprima lutga dal di è quai vegni a l’inscunter tranter il retg da lutga Joel Wicki ed il Grischun Armon Orlik. Suenter paucs muments aveva Wicki ad Orlik sin il dies. Malgrà il bun cumenzament ha Joel Wicki stuì dar si la lutga suenter trais lutgas. Wicki as ha ferì vi dal cumbel.

Armon Orlik ha silsuenter gudagnà cunter Leandro Nägeli ed Ivan Thöni. Encunter il lutgader cun cranz federal Michael Ledermann ha Orlik stuì magunar in pari. Uschia che las schanzas per avanzar en la lutga finala eran reducidas. A la fin ha Armon Orlik anc gudagnà las lutgas tschintg e sis ed uschia ha el terminà la lutga sin plazza tschintg. Gia per la quarta giada ha Orlik uschia gudagnà in cranz sin il Brünig. Il segund lutgader grischun ch’era er da la partida sin il Brünig, Christian Biäsch ha manchentà ils cranzs. El ha terminà la lutga sin plazza 12.

RTR novitads 18:00

Artitgels legids il pli savens

Scrollar a sanestra Scrollar a dretga