La federaziun svizra da skis Swiss Ski ha dà enconuschent ils caders da ski alpin e snowboard alpin en vista a la proxima stagiun.
Freeski
L’Engiadinais Gian Andri Bolinger fa il sigl dal team challenger en il cader A da freeski. Quai sa resulta da las selecziuns che Swiss Ski ha publitgà oz en vista a la proxima stagiun.
Ils dus atlets grischuns, Andri Ragettli da Flem e Giulia Tanno da Lai, restan en l’equipa naziunala.
Talina Gantenbein en l'equipa naziunala
En la disciplina skicross resta Alex Fiva da Parpan en l’equipa naziunala. Talina Gantenbein da Scuol vegn promovida dal cader A en l’equipa naziunala. Il pass cuntrari, da l’equipa naziunala enavos en il cader A, ha percunter da far Tobias Baur dad Arosa. Sandro Lohner da Parpan survegn per l’emprima giada insumma il status da cader C.
Paucs midaments tar ils caders da snowboard
En la disciplina snowboard alpin resta Dario Caviezel da Cuira en l’equipa naziunala. El è l’unic grischun cun quest status. Larissa Gasser da Madulain resta en l’equipa Pro. Ricarda Hauser da Scuol resta en l’equipa Challenger. E per l’emprima giada en in cader da Swiss Ski e Nuri Mosca da Scuol. La proxima stagiun fa er el part a l’equipa Challenger.
Zenhäusern enavos en l'equipa naziunala
Il pli grond pass ensi fa Ramon Zenhäusern ch’è puspè enavos en l’equipa naziunala. La stagiun passada era el anc part dal cader C. Uschiglio n’hai betg dà midaments en l’equipa naziunala. Or da vista grischuna restan Gino Caviezel e Stefan Rogentin part da l’equipa naziunala.
En ils caders pli bass ha Thomas Tumler da Samignun fatg il pass dal cader C en il cader A. Sandro Simonet da Casti vegn promovì dal cader C en il cader B. Il medem fan er Gino Stucki da Sursaissa e Federico Toscano da San Bernardino. Daniele Sette da San Murezzan ha da far il pass enavos dal cader C tar il center da prestaziun naziunal ost.
Tar las dunnas resta Jasmine Flury en l’equipa naziunala. Ella è la suletta Grischuna ch'ha quest status. En ils caders pli bass han Vanessa Kasper da Schlarigna ed Anuk Brändli dad Arosa fatg il pass ensi dal cader C en il cader B. Ed Isabella Pedrazzi da San Murezzan e Sina Fausch da Jenaz vegnan promovidas dal center da prestaziun naziunal ost en il cader C da Swiss Ski.
