Las curlistas svizras cun la skip Silvana Tirinzoni èn campiunessas europeicas. Quai per l'emprima giada suenter ch'ellas han gia cuntanschì quatter giadas il titel da campiunessas mundialas.
En il final ad Aberdeen en la Scozia han las Svizras battì las Talianas cun 6:5. Uschia han ellas gudagnà tut las 11 partidas dal turnier. Il team dal CC Aarau n'ha betg gì la meglra fasa, er ad Alina Pätz sin la quarta posiziun è la penultima emprova malreussida. L'Italia era cun dus craps Shot ed ha fatg grev la vita a la Svizra. In davos crap brigliant ha Pätz lura mess en il center cun in uschenumnà «Hit and Roll».
La davosa giada che curlistas svizras èn daventadas campiunessas europeicas è stà il 2014 tras la squadra da Flem cun la skip Binia Feltscher.
