Mujinga Kambundji ha gudagnà argient sur ils 100 meters als campiunadis europeics d'atletica leva a Minca. Cun 10,99 secundas ha la curridra svizra realisà il medem temp sco la victura – la Tudestga Gina Lückenkemper. Il fotofinish ha però decis per 0,005s a favur da l'atleta da la Germania uschia ch'ils sentiments da Kambundji èn maschadads.
Tuttina èsi il meglier resultat per la Bernaisa a campiunadis europeics. Il 2016 era Kambundji currida per bronz ad Amsterdam.
Simon Ehammer è vicecampiun europeic en il decatlon
Mardi saira hai però anc dà in'ulteriura medaglia d'argient per la Svizra. Simon Ehammer è vegnì vicecampiun europeic en il decatlon. Cun 8'468 puncts ha l'Appenzellais meglierà ses agen record svizzer per 91 puncts. Meglier ch'il Svizzer è be stà il Tudestg Niklas Kaul. Fin tar ils 1'500 meters è Ehammer adina stà a la testa, ma il Svizzer na deplorescha betg d'avair manchentà aur.
Als campiunadis mundials ad Eugene aveva Ehammer gia gudagnà bronz en il segl lung ed è stà sco emprim decatlonist svizzer insumma sin in podest.