Siglir tar il cuntegn

Header

cuntegn

Campiunadi europeic La Svizra gioga pari 1:1 cunter la Valisa

La naziunala svizra gioga pari 1:1 cunter la Valisa. Malgrà ch'ils Svizzers èn suenter pausa ids cun 1:0 en avantatg cunter la Valisa n'hai betg tanschì per la victoria.

Cumenzà ha tut tenor plan. La Svizra è stada durant l'emprima mesadad la pli ferma equipa – n'ha dentant malgrà intginas bunas schanzas betg pudì far igl 1:0. Suenter pausa èn ils giugaders svizzers vegnids ferm ord la cabina e Breel Embolo, ch'ha giugà ina ferma partida, ha sajettà il 1:0 suenter ina flanca da Shaqiri. Silsuenter ha la squadra da Petkovic dentant pers in zic la concentraziun. Ils Valisans èn vegnids pli e pli ferms ed han pudì egualisar la partida entras Moore. Bain avessan els schizunt pudì sajettar il 1:2 ord vista da la Svizra.

Cun la midada da Gavranovic en las ultimas minutas da la partida è quella puspè sa midada. Ils Svizzers han giu bunas schanzas e han entras Gavranovic schizunt fatg il 2:1 – ma l'attatgader è stà egl offsides. Silsuenter ha il goli da la Valisa Danny Ward, anteriur goli tar Liverpool, anc fatg intginas bunas paradas ed uschia salvà a la Valisa il 1:1.

video
Petkovic: «Nus essan stads paucas minutas memia passiv»
Or da Sport-Clip dals 12.06.2021.
laschar ir. Durada: 5 minutas 33 Secundas.

Segunda partida cunter l'Italia

Per la Svizra hai uss num far valischa ed ir a Roma. En la chapitala taliana frunta la Svizra en sia segunda partida la mesemna sin la «squadra azzurra» ch'ha gudagnà en l'emprima partida dal campiunadi europeic cun 3:0 cunter la Tirchia.

RTR actualitad 08:00

Artitgels legids il pli savens