A la cursa da 15 kilometers individual è Silvano Demarmels da Salouf vegnì 58avel. Sin il prim plaz han set minutas e 55 secundas mancà. Ses collega en l'equipa Pacal James è vegnì pli datiers a Leonhard Pfund (GER) sin il prim plaz, ad el ha mancà radund ina minuta, quai ha tanschì per il tschintgavel plaz.
Meglier èsi ì la sonda per Marina Benderer da Sent al campiunadi mundial da junioras a Nove Mesto. Ella è vegnida 17avla en la cursa da 10 kilometers. Ella è stada 2 minutas e 52 secundas davos Alma Siegismund da la Germania. Alessia Laager da Samedan n'è betg vegnida rangada en ils resultats uffizials.
En la cursa da 12,5 kilometers da las dunnas individual ha Julia Tannheimer (GER) gudagnà. La Svizra Enya Muerner è vegnida 34avla, e Lara Berwert 50avla (passa 8 minutas retard).
Trio grischun al campiunadi mundial dals juniors en l'Estonia
Dals 23 da favrer fin ils 2 da mars vegn cumbattì per medaglias al campiunadi mundial da biatlon da giuvenils e juniors ad Otepää en il sid da l’Estonia. Swiss Ski cun la nova schef-trenadra Selina Gasparin ha selecziunà per quest punct culminant da la stagiun 14 atletas ed atlets, da quai in trio grischun Alessia Laager da Samedan, Marina Benderer da Sent e Silvano Demarmels da Salouf.
Ina speranza per ina medaglia ha cunzunt Alessia Laager. L’Engiadinaisa da 19 onns ha gia gudagnà al davos campiunadi mundial avant in onn en il Kasachstan argient en la cursa individuala sur 10 kilometers. Quest onn parta ella sco ina da las veglias e pli rutinada en sia categoria.
Pli modestas èn las ambiziuns tar Marina Benderer (18) e Silvano Demarmels (19) che fiss cuntent cun in u l’auter resultat sut ils top 20, er perquai ch'el è quest onn in dals giuvens en sia categoria da juniors. Schanzas han atletas ed atlets en pliras cursas. Sco tar l'elita datti er al campiunadi mundial da giuventetgna mintgamai ina cursa da sprint, ina cursa individuala, ina cursa cun partenza en massa, ina staffetta ed ina staffetta maschadada.
Premiera per Selina Gasparin
Per l’emprima giada en uffizi ad in eveniment grond è er Selina Gasparin, la nova schef-trenadra dals biatlets giuvens tar Swiss-Ski. Ella ha cumenzà uffizialmain ses nov post l’emprima da favrer sco successura da Hartwig Birrer ch’è ì en pensiun.
Sco schef-trenadra sustegna Selina Gasparin en emprima lingia il schef da la disciplina biatlon, Lukas Keel, en chaussa svilup da quest sport en Svizra. Plinavant è l’anteriura biatleta, ch’aveva scrit istorgia cun gudagnar argient als gieus olimpics il 2014 a Sotschi, responsabla per la planisaziun, la coordinaziun en quest sectur dals giuvenils e juniors ch’èn anc al cumenzament da lur carrieras.
Ad in campiunadi mundial da juniors giaja en emprima lingia per rimnar experientscha.
Per las atletas ed ils atlets giuvens saja quai in highlight d’astgar ir a la partenza ad Otepää, ch'aveva gia organisà il 2018 quest campiunadi mundial da biatlon dals juniors, e da pudair represchentar la Svizra. Rimnar experientscha haja prioritad, uschia Selina Gasparin che sa regorda anc bain da ses emprim campiunadi mundial dals juniors. Ina medaglia ad in tal campiunadi mundial dettia franc in stausch e saja gronda motivaziun per l’avegnir, però nagina garanzia ch’i funcziunia lura era tar l’elita en la cuppa mundiala.