Igl era la saira dals 25 da matg 2022, cura ch'igl era vegnì decidì ch'il campiunadi mundial 2027 ha lieu en il Vallais. Crans-Montana è sa mess atras en il gremi electoral, la suprastanza da la FIS, cun 11 vuschs gia en l’emprim scrutini cunter las trais candidaturas dad Andorra (Soldeu), Norvegia (Narvik) e Germania (Garmisch).
Betg per plaschair dal president Johan Eliasch. Il milliardari svedais-britic a la testa da la federaziun mundiala avess gì pli gugent sch'ils Andoranais fissan vegnids resguardads.
Rinfatschas vehementas da vart da la FIS
Suenter che l'arbiter è vegnì elegì, è enfin ussa stà il proceder usità ch'il contract dal campiunadi mundial tranter la FIS e l'organisatur vegn suttascrit entaifer paucs mais. En il cas dal campiunadi mundial 2027 è quai dentant anc adina betg capità suenter 21 mais.
Venderdi saira è la FIS ida sin curs da confruntaziun. Sin fundament da retschertgas da la NZZ ha la federaziun mundiala publitgà in statement brisant sin ses chanals. En quel hai num che Swiss-Ski na veglia betg ademplir las obligaziuns dal contract ch'èn vegnidas fatgas en il dossier da candidatura. Manegiadas sajan las garanzias finanzialas da vart da la Confederaziun, dal chantun Vallais e da la corporaziun da vischnancas Crans-Montana. La FIS di che Swiss-Ski haja fatg empermischuns falladas.
Smanatscha da retrair il campiunadi mundial
Diego Züger, il CEO Commercial da Swiss-Ski, ha ditg: «Nus renviain las renfatschas da la FIS, da betg avair sa tegnì vi d'empermischuns fatgas en la fasa da candidatura, e quai en tutta furma.» Züger di vinavant che Swiss-Ski proponia dapi l'entschatta empermischuns fixas da la Confederaziun, dal chantun e da las vischnancas davart contribuziuns da sustegn, l'autezza da quellas saja «gia daditg fixà». Nagut haja sa midà vi da las cundiziuns generalas dapi lura.
Plitost, uschia constatescha Diego Züger en la NZZ, saja quai la FIS che haja «midà las cundiziuns» durant las tractativas. Per quest motiv dettia quai enfin uss «anc nagina soluziun». Empè d’ina soluziun smanatschia uss plitost l’escalaziun. En il statement da la federaziun mundiala hai num: «Sche Swiss-Ski na po betg ademplir las obligaziuns, n'haja la FIS nagin'autra letga che da surdar il campiunadi mundial alpin 2027 ad in auter candidat.»
Tenor il cusseglier federal Guy Parmelin n'è il campiunadi mundial da skis a Crans-Montana il 2027 betg periclità. Davart da la Confederaziun sajan las garanzias finanzialas vegnidas approvadas gia il 2022, ha ditg Parmelin envers l'agentura da novitads Keystone-SDA.
Affaire à suivre
In tal proceder avess senza dubi consequenzas giuridicas. La smanatscha da retrair la candidatura vegn discutada intensivamain la fin d’emna a Crans, nua che gist las cursas da la cuppa mundiala che han lieu mintg’onn vegnan organisadas.