Ina buna fin prenda il campiunadi mundial ad Ottawa en il Canada per ils curlists svizzers. La clera victoria cunter l'Italia porta la medaglia da bronz a l'equipa cun Pablo Lachat, Sven Michel, Yannick Schwaller e Benoît Schwarz.
La Svizra ha mess sut squitsch l'equipa taliana gia davent da l'emprim end, cun plazzar dus craps. Auter che l'adversari n'han ils Svizzers nagins sbagls pli grops, uschia ch'els han pudì engular crap per crap. Pia fatg puncts en ends, nua ch'els n'avevan betg il davos crap.
Sa revegnids bain suenter terrada cunter il Canada
Il mezfinal cunter ils indigens dal Canada aveva l'equipa enturn il skip Yannick Schwaller pers cun 5:7. Quai suenter ch’ils Svizzers avevan gudagnà en seria las ultimas otg partidas da la Round Robin. La suletta terrada en la qualificaziun avevi dà cunter ils Talians.
Aur per la Scozia
En il final ha la Scozia battì la squadra ospitanta dal Canada cleramain cun 9:3.
