Dapi divers onns parta Cédric Follador da Bever cun il bob a dus, dentant era cun il bob a quatter en la cuppa d’Europa. Tranteren ha el dentant era pudì ir a la partenza da cursas da la cuppa mundiala da bob. A La Plagne en Frantscha avant in onn ha el gì sia premiera tar l’elita.
In da trais bobs svizzers a la partenza
Dacurt è Michael Vogt vegnì cun il bob a quatter campiun mundial da juniors a San Murezzan. Cédric Follador era sco tschintgavel il segund meglier Svizzer. Damai ch'il pilot engiadinais ha era gia mussà bunas prestaziuns ad Altenberg en la cuppa d’Europa – ha la Federaziun svizra da bob nominà el per quest campiunadi mundial. Che Follador conuscha la pista ad Altenberg è segir in avantatg. Er sch'il chanal da glatsch sa preschenta adina in zichel en in'autra furma.
Il pilot è il medem, l’equipa dentant mida
Fertant che Cédric Follador è adina il pilot, mida il rest da l’equipa dal bob adina in zichel. Dal campiunadi mundial da juniors a San Murezzan po il pilot engiadinais prender ils dus stumpladers cun el, il franader dentant vegn remplazzà atras in pli ferm. Per eruir il campiun mundial en il bob a quatter datti quatter cursas durant dus dis.