Al campiunadi mundial da mountainbike a Les Gets en Frantscha è Camille Balanche vegnida quarta en la cursa da downhill. La campiunessa mundiala dal 2008 ha manchentà be per 0,8 secundas sia terza medaglia en seria ad in campiunadi mundial. Avant in onn a Val di Sole aveva Balanche gudagnà bronz.
Gudagnà la cursa ed uschia daventada nova campiunessa mundiala ha l’Austriaca Valentina Höll. Il podest han cumplettà la Tudestga Nina Hoffmann e la Franzosa Myriam Nicole.
Bruni ina classa per sasez
La cursa da downhill dals umens ha gudagnà il matador local Loïc Bruni. Per il Franzo èsi suenter il 2015, il 2017, il 2018 ed il 2019 gia il 5avel titel da campiun mundial. Bruni ha triumfà a Les Gets avant ses dus cumpatriots Amaury Pierron (+2,581 sec.) e Loris Vergier (+3,386 sec.).
Meglier svizzer è stà Lino Lehmann sco 51avel cun in retard da bunamain 17 secundas. Noel Niederberger ha terminà la cursa da downhill sco 54avel.