Filippo Colombo gudogna al campiunadi mundial da mountainbike a Les Gets en Frantscha argient en la cursa da short-track, quai avant ses collega d'equipa Thomas Litscher che turna uschia a chasa cun la medaglia da bronz. Gudagnà il titel ha Samuel Gaze da la Nova Zelanda.
Suenter ch'il defensur dal titel, Christopher Blevins (USA) ha ristgà memia bler per surpassar Gaze curt avant l'arrivada, è l'American ruclà. Quest discletg da Blevins è però era stà il cletg per Colombo e Litscher. Colombo ha pudì surpassar Blevins ed è vegnì segund. Blevins ha però empruvà da defender il terz plaz encunter Litscher, ha però sentì che ses bike na funcziunava betg pli optimal, uschia ch'el ha stuì laschar passar Litscher sin plaz trais.
Il Lumnezian Vital Albin ha terminà la cursa sco 14avel. Nino Schurter n'è betg stà a la partenza. El metta il focus cumplainamain sin la cursa roiala da cross-country nua ch'el ha la schanza da daventar per la 10avla giada campiun mundial.
Argient per Alessandra Keller en il short-track
Alessandra Keller (26) dal chantun Sutsilvania gudogna argient en la cursa da short-track dals campiunadis mundials da mountainbike a Les Gets. Suenter ch'ella era crudada ed era dada enavos sin ils plazs sur 10, ha Keller mussà ina ferma reacziun ed uschia anc pudì far il pass sin il podest.
Gudagnà aur a moda suverana ed uschia daventada nova campiunessa mundiala è Pauline Ferrand-Prévot. La Franzosa è stada 18 secundas pli sperta ch'Alessandra Keller. Terza è daventada l'Americana Gwendalyn Gibson. Ella ha pers 21 secundas sin Ferrand-Prévot. La campiunessa olimpica Jolanda Neff ha stuì sa cuntentar cun il quart plaz.
Ina buna prestaziun ha er Steffi Häberlin mussà cun ses 9avel plaz. La defensura dal titel, la Svizra Sina Frei che veva gudagnà aur avant in onn a Val di Sole, è vegnida be 15avla.