Siglir tar il cuntegn

Header

cuntegn

Campiunadi mundial d'unihoc Nagina medaglia per la Svizra, 10avel campiunadi per la Svezia

Suenter las terrada cunter la Tschechia sonda saira en il mezfinal ha la er pers sia ultima partida dal campiunadi mundial a chasa. La Svizra perda cun 3:5 cunter la Finlanda. En la prerunda  aveva la Svizra anc gudogna cunter la Finlanda cun 7:5.
Er questa giada esi stà stgars, suenter esser enavos 1:4 è la Svizra stà buna da far dus gols. Curt avant la fin han ils Finlandais dentant lura finì il gieu cun il 5:3 en il gol vid dals Svizzers.

En il final ha la Svezia gudogna senza problems cunter la Tschechia cun 9:3. Cun èn ils scandinavs gia per la 10avla giada campiuns mundials.

Mezfinal: Terrada brutala cunter la Tschechia

La Svizra ha manchentà il final dal campiunadi mundial dad unihockey en l'agen pajais cleramain. Cunter la Tschechia han ils Svizzers pèrs cun 11:3. En il final da damaun a Turitg frunta la Tschechia sin la Svezia ch'ha battì la Finlanda cun 4:3 suenter sajettar penaltis.

Ils unihockeyans svizzers avevan la schanza da cuntanscher il final dad in campiunadi mundial per la segunda giada en l'istorgia. Il duel Svizra - Tschechia hai gia dà numerusas giadas a campiunadis mundials. Surtut en duels per la medaglia da bronz, ch'ils Tschecs han gudagnà duas giadas, la davosa giada a l'ultim campiunadi mundial avant 1 onn.

audio
La Svizra avant il cumbat per vegnir en il final
ord Actualitad dals 12.11.2022.
laschar ir. Durada: 3 minutas 2 Secundas.

Quartfinal: Svizra batta la Lettonia

Ils Svizzers fan il pass en il mezfinal dal campiunadi mundial a chasa. En l'emprim terz manava la Svizra anc cun 2:0. En il segund han ils Svizzers gì da morder encunter ils umens da la Lettonia. Cun 2:1 èn els ir en il terz terz. Là han els dentant pudì engrondir la bilantscha da goals e la finala gudagnà cun 3:1 la partida.

Uschia stat la Svizra per la 12avla giada en seria en il mezfinal. En il mezfinal vegn la Svizra a fruntar sin la Tschechia.

3. gieu: Svizra batta la Slovachia

Cun 9:3 n'han ils Svizzers laschà nagins dubis e battì cleramain ils Slovacs. Uschia è la Svizra a la testa da la gruppa e cuntanscha il quartfinal. Cun sia prestaziun en la runda d'eliminaziun ha la Svizra cleramain surpassà las atgnas spetgas.

2. gieu: Svizra batta la Finlanda

Per l'emprima giada dapi 18 onns gudogna la Svizra cunter la Finlanda e quai cun 7:5. L'emprim è la Svizra anc ida en avantatg cun 3:0. Lura è la Finlanda per part vegnida suenter fin tar in gol, er pervia dad in autogol da Michael Schiess. La finala han ils Svizzers stuì suttacumber al vice-campiun mundial.

Il proxim gieu è il mardi cunter la Slovachia. Sche la Svizra vegn d'ademplir las aspectativas sco squadra favurita, sa qualifitgescha ella sco victura da la gruppa per ils quart-finals.

1. gieu: Be in pari cunter la Norvegia

En l'emprim gieu dal campiunadi mundial ha la Svizra cumenzà bain ed ha sajetta dus gols. Michael Schiess e Claudio Laely han tutgà per la Svizra. Lura ha l'equipa dentant perdì la controlla dal gieu, uschia ch'igl è sa resultà be in pari da 4:4.

video
Norvegia cuntanscha in pari cunter il favurit Svizra
Or da Sport-Clip dals 05.11.2022.
laschar ir. Durada: 3 minutas 10 Secundas.

Adrian Capatt – il Rumantsch cun medaglia d'argent

Adrian Capatt, ch'ha giugà passa 70 gieus per la naziunala e ch'ha 1998 cuntanschì il final e gudagnà argient è realist. El vesa inqual deficit tar la naziunala sin sia missiun final.

Unihockeyan en acziun
Legenda: Adrian Capatt tar in da ses ultims gieus tar Alligator Malans (2011) rtr

Igl è la terza giada che la naziunala svizra ha avantatg da chasa ad in campiunadi mundial d'unihoc (dals 5 fin ils 13 da november a Turitg e Winterthur). La federaziun ha mess sco finamira da cuntanscher il final. Ina missiun che lascha sa desperar ils unihockeyans svizzers dapi l'onn 1998. Là aveva la naziunala eliminà en il mez-final ils Finlandais en la lutga da penaltis. Il final han ins lura pers encunter ils Svedais ch'èn campiuns mundials da record cun 9 titels.

audio
Prevista sin il campiunadi mundial cun Adrian Capatt
ord Actualitad dals 31.10.2022.
laschar ir. Durada: 4 minutas 30 Secundas.

Nus vivevan per l'unihoc

Adrian Capatt ch'ha furmà l'equipa naziunala da quella giada sa regorda gugent da quest success. Sch'el cumpareglia la naziunala da lezza giada e quella dad oz constatescha el inqual deficit, surtut mental. Per els devi nagut auter ch'unihoc. Giugaders impulsivs, che provocavan era gugent. Igl eri ina buna maschaida tranter giugaders rutinads e giuvens. Era quai è tenor Adian Capatt in deficit en la naziunala dad oz. Il cader saja restà quasi il medem ils ultims onns. Era per il campiunadi a chasa ha il trenader David Jansson nominà be trais novs.

I dovra in trenader svizzer

Suenter otg onns a la banda da la naziunala svizra, ha il Svedais David Jansson communitgà dacurt ch'el smettia cura che la WM è a fin. Quai proceder da la federaziun, curt avant ch'il campiunadi da chasa cumenza crititgescha Capatt. Era sch'el n'ha nagut encunter ch'il temp da Jansson va a fin. Per che la Svizra possia avair success en il futur dovria in trenader svizzer è Capatt persvadì. In che chapeschia la mentalitad e co giugaders en noss pajais funcziunan. Ils Scandinavs na sajan betg quels da gronds pleds. Ils Svizzers dovrian quai discutar ed analisar e promover in l'auter. Sco lezza giada tar il success 1998.

RTR actualitad 08:00

Artitgels legids il pli savens

Scrollar a sanestra Scrollar a dretga