Al campiunadi mundial da biatlon a Nove Mesto en Tschechia n'ha la Svizra Lena Häcki-Gross betg pudì ademplir las grondas spetgas. En la cursa singula sur 15 kilometers è ella - sco meglra svizra - vegnida 17avla. Häcki-Gross ha fatg trais sbagls da sajettar ed ha la fin finala gì in retard da passa trais minutas sin la victura. Las spetgas envers Häcki-Gross èn stadas grondas perquai ch'ella aveva gudagnà la davosa cursa singula avant il campiunadi mundial. Ultra da quai maina ella actualmain en il classament general da la cuppa mundiala en questa disciplina.
Aita Gasparin è sco segund meglra svizra vegnida 46avla, sia sora Elisa Gasparin 50avla ed Amy Baserga 51avla.
Victoria taliana
Gudagnà la cursa ha la Taliana Lisa Vittozzi. Per Vittozi è questa medaglia il pli grond success da sia carriera. Per la medaglia d'argient è ida la Tudestga Janina Hettich e bronz ha gudagnà la Franzosa Julia Simon. Simon aveva avant gia gudagnà trais medaglias d'aur a Nove Mesto.