Ulteriur exploit da l'equipa da curling svizra al campiunadi mundial a Calgary. L'equipa da Genevra cun il skip Peter De Cruz ha gudagnà cunter il grond favurit il Canada cun il skip Brendan Bottcher cun 6:4 suenter in end supplementar. Normalmain n'èsi strusch pussibel da gudagnar cunter in'equipa canadaisa en in end supplementar sche quel ha er anc l'ultim crap. Ils Genevrins han dentant mussà en quest gieu, ch'igl è pussaivel. Els han schizunt engulà dus craps.
Suenter quatter da 13 gieus da la Round Robin ha la Svizra gudagnà quatter giadas ed ha gia dà cunter ils gronds favurits. En l'emprima partida ha la Svizra battì il defensur dal titel la Svezia, silsuenter gudagnà cunter la Germania ed il Giapun. La medema bilantscha sco la Svizra ha il mument be anc la Norvegia. Lezza ha però anc da giugar cunter ils topfavurits Canada e Svezia.
