Ultima cursa da campiunadis mundials per Schurter
Tar sia ultima cursa a campiunadis mundials va Nino Schurter sin il 42avel plaz il cross-country. Il Lumnezian perda 8 minutas e 48 secundas sin il pli spert. La finamira da far tar ses ultims campiunadis mundials n'è betg gartegià. Tar l'arrivada è el dentant vegnì celebrà sco in victur – il publicum da chasa a Crans-Montana ha procurà per in bel bainvegni.
Il resultat na saja dentant gnanc uschè impurtant, uschia Schurter. Plitost haja el giud l'atmosfera. Gia avant la cursa hajan ins mussà in video da sia carriera – in mument fitg emoziunal. La cursa era lura a fin gia avant la partenza – ord spira emoziunalitad haja bunamain mancà l'aria.
Il segund Lumnezian, Vital Albin, fa a la fin in 18avel rang. El ha in retard da quatter minutas sin il victur. Cun sia prestaziun saja el cuntent, dentant avess el gugent gì in meglier rang a la fin. Spezial saja stà la durada da la cursa: Cun 9 rundas e passa in'ura e mez temp saja la routa stada pli dirra ch'er gia. Surtut tar l'ultima runda hajan ins stuì morder fitg.
Cross-country U23: Chiara Solér vegn 11avla, Hutter vegn quarta
La squadra svizra U23 da las dunnas mussà ina buna prestaziun al cross-country. team. Anina Hutter, ch'ha ragischs a Trimmis, è vegnida quarta. Sco ch'ella di, saja quel rang final ina surpraisa. Ella saja fitg loscha da sia prestaziun – lauda dentant er il rest dal team. Il sustegn e support ch'ins haja sentì e dà ina da l'autra saja simplamain genial.
Ina ferma prestaziun mussa er la Lumneziana Chiara Solér. Ella vegn 11avla, manchenta per paucas in plaz en ils top 10. Tuttina saja ella «pli che happy». Gest suenter la cursa na po ella anc betg crair tge prestaziun ch'ella ha fatg – surtut cun quai che la cursa n'ha betg cumenzà optimala per ella.
Da far part al campiunadi mundial en l'agen pajais saja stà ina experientscha speciala. En mintga curva e tar mintga muntada saja la glieud vid il clamar e motivar. Quai saja grondius, uschia Solér.
-
Bild 1 von 4. Ferma prestaziun da la squadra svizra U23: 7 atletas en ils top20. Bildquelle: Keystone.
-
Bild 2 von 4. Motiv da celebrar: Anina Hutter vegn quarta al campiunadi mundial da cross-country U23. Bildquelle: Keystone.
-
Bild 3 von 4. Per pauc manchenta Chiara Solér in plaz ils top10. Tuttina èsi ina ferma prestaziun. Bildquelle: Keystone.
-
Bild 4 von 4. Chiara Solér durant la cursa. Bildquelle: Keystone.
Prevista: Trio Lumnezian ha en mira in plaz da top 10
Nino Schurter, Vital Albin e Chiara Solèr – trais Lumnezians che vulan far furora la dumengia al campiunadi mundial da mountainbike a Crans-Montana.
Ils Lumnezians en l'intervista
Durant che Nino Schurter va per la davosa giada insumma a la partenza ad in cursa d’in campiunadi mundial è ses collega da Tersnaus, Vital Albin, led da puspè far part a l’equipa svizra suenter ver manchentà la qualificaziun per il davosa campiunadi mundial avant in onn a Vallnord en l’Andorra. Omadus han pudì trenar bain sin quest punct culminant da la stagiun, ma tar ils gronds favurit audan auters. Tant Schurter sco er Albin emprovan da cuntanscher in plaz sut ils top 10 a quest campiunadi mundial da chasa.
Chiara Solèr: «Igl è mega cool dad esser qua»
D’in sumegliant resultat siemia er Chiara Solèr da Lumbrein che parta en la categoria da las dunnas U23. Suenter avair manchentà la qualificaziun per il campiunadi d’Europa la fin fanadur en il Portugal è Crans-Montana stà la gronda finamira. Grazia a bunas prestaziuns cun in plaz sut las top 20 en la davosa cursa da la cuppa mundiala a Les Gets en Frantscha è la giuvna da 20 onns vegnida risguardada da Swiss Cycling. Il percurs a Crans-Montana saja pretensius, cunzunt fisicamain e tecnicamain, insatge che vegnia encunter ad ella, uschia Chiara Solèr.
Anina Hutter: «Ils fans da chasa dattan in extra boost»
La mountainbikera da 20 onns oriunda da Trimmis è ina dals trumfs svizzers en la cursa da cross-country da las dunnas U23 a Crans-Montana. Hutter ha mussà en questa stagiun divers resultats da top 10 en la Cuppa mundiala ed al Campiunadi d’Europa la fin fanadur en il Portugal è ella vegnida segunda ed uschia gudagnà argient. Ina medaglia fiss era il siemi a Crans-Montana. Mo la giuvna grischuna na vul betg sa focusar sin medaglias. Ella lessi dar tut e lura saja bler pussibel, er perquai ch’il percurs da cursa vegnia encunter ad ella.
Suenter ils campiunadis mundials en il Vallais spetga cun la cuppa mundiala a Lai gia il proxim punct culminant. Silsuenter dastga la giuvna grischuna lura anc sgular a Ruanda en l’Africa per ils campiunadis mundials da via.
Andri Steinmann da Cuira avant sia premiera
Durant che Nino Schurter parta a Crans-Montana a ses 22avel e davos campiunadi mundial da mountainbike spetga sin Andri Steinmann da Cuira la premiera. Il giuven da 17 onns ch’ha cumenzà pir avant bun 5 onns ad ir cun bike è vegnì selecziunà da Swiss Cycling per la cursa da cross-country dals juniors U19. Il plaschair saja enorm, er d’astgar far part a questa famiglia da la naziunala svizra ensemen cun in Nino Schurter, ses grond idol. Andri Steinmann fa part al Club da velo, il RMV Cuira, ed ha cumenzà l’avust in emprendissadi da electroinstallatur.
Sia premiera ad in campiunadi mundial da mountainbike ha Andri Steinmann il venderdi, ils 12 da settember. En l'intervista cun Andreas Wieland ha el discurrì davart sias emprimas impressiuns, ses andament e tge rolla che Nino Schurter gioga en sia carriera.
Nino Schurter: «Ina medaglia fiss in siemi»
En il center stat cunzunt era Nino Schurter. Il 2003 è il mountainbiker oriund da Tersnaus stà per l’emprima giada a la partenza ad ina cursa da campiunadis mundials, quai sco junior a Lugano. Uss, 22 onns pli tard, va quest viadi a fin. Nino Schurter è tranter auter vegnì 10 giadas campiun mundial tar l’elita – in record. A Crans-Montana vul il meglier mountainbiker da tut il temp anc ina giada mussar sia classa e sche tut va si era cumbatter per ina medaglia.
La finamira saja d’almain cuntanscher in plaz sut ils top 10, uschia Nino Schurter che parta era per la Svizra en il Team Relay, là cun gronda schanza da medaglia.
Campiunadis mundials en l’entir Vallais
Suenter ils campiunadis svizzers il 2023 ha Crans-Montana pudì organisar l’onn passà per l’emprima giada cursas da la cuppa mundiala da cross-country. Quai è stà l’emprova generala per il punct culminant dal 2025. Quest onn vai per las medaglias. Ils Svizzers tutgan dapi decennis tar ils megliers mountainbikers dal mund e partan uschia cun grondas ambiziuns a quests campiunadis mundials da chasa. La gronda speranza svizra è Alessandra Keller ch’ha gia triumfà en la cursa da short track ed uschia gudagnà ses emprim grond titel tar l’elita.
Ils campiunadis mundials da mountainbike en il Vallais han gia cumenzà ils 30 d’avust. Las cursas dad Enduro e quellas dad E-MTB èn stadas a Bellwald, las occurrenzas da pump track a Monthey, las cursas da maraton a Verbier, quellas da downhill a Champéry e las cursas da short track a Zermatt. Crans-Montana cun lur cursas da cross-country è uschia la staziun finala da quels emprims campiunadis mundials cun tut las concurrenzas da mountainbike sut in tetg.