A Crans-Montana van ils campiunadis mundials da mountainbike 2025 a fin cun las cursas da cross-country. Per la davosa gia a la partenza a campiunadis mundials è Nino Schurter. Plinavant van ord vista grischuna a la partenza Vital Albin, er el oriund da Tersnaus, tar l’elita, Chiara Solèr da Lumbrein ed Anina Hutter da Trimmis en la categoria U23 ed il junior Andri Steinmann da Cuira parta per l’emprima giada en la categoria U19.
Suenter ils campiunadis svizzers il 2023 ha Crans-Montana pudì organisar l’onn passà per l’emprima giada cursas da la cuppa mundiala da cross-country. Quai è stà l’emprova generala per il punct culminant dal 2025. Quest onn vai per las medaglias. Ils Svizzers tutgan dapi decennis tar ils megliers mountainbikers dal mund e partan uschia cun grondas ambiziuns a quests campiunadis mundials da chasa. La gronda speranza svizra è Alessandra Keller ch’ha gia triumfà en la cursa da short track ed uschia gudagnà ses emprim grond titel tar l’elita.
Andri Steinmann da Cuira avant sia premiera
Ils Campiunadis mundials a Crans-Montana èn ils emprims campiunadis mundials per Andri Steinmann. Il giuven atlet da Cuira sa participescha en la categoria U19 en il cross-country e short track. El sa descriva sez sco «in buob ch'ha plaschair da sa muventar e bler auter». Da far uss part a campiunadis mundials saja dentant in auter nivel da plaschair – in siemi giaja en vigur.
Sia premiera ha el venderdi, ils 12 da settember. En l'intervista cun Andreas Wieland ha Andri Steinmann discurrì davart sias emprimas impressiuns, ses andament e tge rolla che Nino Schurter gioga en sia carriera.
Nino Schurter: «Ina medaglia fiss in siemi»
En il center stat cunzunt era Nino Schurter. Il 2003 è il mountainbiker oriund da Tersnaus stà per l’emprima giada a la partenza ad ina cursa da campiunadis mundials, quai sco junior a Lugano. Uss, 22 onns pli tard, va quest viadi a fin. Nino Schurter è tranter auter vegnì 10 giadas campiun mundial tar l’elita – in record. A Crans-Montana vul il meglier mountainbiker da tut il temp anc ina giada mussar sia classa e sche tut va si era cumbatter per ina medaglia.
La finamira saja d’almain cuntanscher in plaz sut ils top 10, uschia Nino Schurter che parta era per la Svizra en il Team Relay, là cun gronda schanza da medaglia.
Campiunadis mundials en l’entir Vallais
Ils campiunadis mundials da mountainbike en il Vallais han gia cumenzà ils 30 d’avust. Las cursas dad Enduro e quellas dad E-MTB èn stadas a Bellwald, las occurrenzas da pump track a Monthey, las cursas da maraton a Verbier, quellas da downhill a Champéry e las cursas da short track a Zermatt. Crans-Montana cun lur cursas da cross-country è uschia la staziun finala da quels emprims campiunadis mundials cun tut las concurrenzas da mountainbike sut in tetg.