Siglir tar il cuntegn

Header

cuntegn

Campiunadi mundial da para Luca Tavasci è l’unic passlunghist svizzer al campiunadi mundial

Per l’emprima giada datti in campiunadi mundial da para sport che unescha las disciplinas passlung, ski alpin e snowboard. A Lillehammer en la Norvegia ha lieu quest campiunadi mundial. Nov atletas ed atlets svizzers èn er da la partida. Tranter quels Luca Tavasci da Samedan.

Dapi sia naschientscha viva Luca Tavasci da Samedan senza maun sanester. En la medischina discurran ins dad ina aplesia. Pervia da ses maun che manca n’è Luca Tavasci mai sa sentia handicapà. Cun 12 onns en scola è el stà per l’emprima giada sin skis da passlung. Era sch'il plaschair n'era a l’entschatta betg grond, ha el cumenzà da trenar quest sport. Tavasci na vuleva betg adina esser il davos tar las cursas. Uschia è creschida sia passiun ch'al ha manà fin tar ils paralimpics l’onn 2018 a Pyeongchang.

audio
Luca Tavasci va al champiunadi mundial da para sport
aus Actualitad vom 17.01.2022.
abspielen. Laufzeit 2 minutas 57 Sekunden.

Campiunadi mundial a Lillehammer è la prova generala

Suenter inqual cuntraculp trenescha il passlunghist da Samedan uschè professiunal sco anc mai. En sia fatschenta ha el pudì prender congedi durant trais mais – per sa preparar optimalmain sin il campiunadi mundial da para sports a Lillehammer, dentant era sin ils gieus olimpics da Peking. L’emprima etappa tar ils proxims gieus è il campiunadi mundial. Quel unescha per l’emprima giada en l’istorgia las disciplinas da passlung, skis e snowboard. Per il moviment para sportiv è quai in novum.

Corona e perquai en isolaziun

Il campiunadi mundial ha cumenzà per Luca Tavasci en isolaziun a Samedan. El ha s'infectà cun il coronavirus ed ha perquai stuì star a chasa. Per fortuna aveva il sportist planisà davent da l’entschatta in bloc da recreaziun il principi da schaner. Uschia n'ha el betg pers uschè bler pervia da l’isolaziun. Uss è el pront per far il viadi a Lillehammer e per ir a la partenza da la cursa da distanza sur 20 kilometers il stil liber, e per las cursas da sprint en il stil classic.

Il 2017 aveva il Minisguard fatg in purtret:

video
Luca Tavasci fa passlung cun be in maun
Or da Minisguard dals 18.03.2017.
abspielen. Laufzeit 3 minutas 22 Sekunden.

RTR actualitad 17:00

Artitgels legids il pli savens

Scrollar a sanestra Scrollar a dretga