La saira suenter lavurar s’entupar cun amias ed amis, baiver ni magliar insatge e far cumadaivel sin il canapé avant la televisiun ni tar in public viewing. Uschia han blers e bleras giudì ils gieus da ballape dals campiunadis europeics dals umens il 2021, da las dunnas il 2022 ni dal davos campiunadi mundial dals umens a Qatar.
Tar il campiunadi mundial da las dunnas ch'è per il mument da tschai maun dal mund en l'Australia e la Nova Zelanda, è quai pli grev. Ils gieus èn savens la damaun baud. Tuttina, bleras persunas che dattan sezzas ballape guardan ils gieus ni s'interesseschan per ils resultats, co ellas ed els han ditg ad RTR.
Era sch’ils gieus èn la damaun baud, lura guardan ins in zichel durant lavurar e la saira lura las resumaziuns dals gieus.
Las cifras actualas
Sin SRF 2 han passa 170'000 persunas guardà il segund gieu da la Svizra encunter la Norvegia. Il gieu da la Germania encunter il Maroc han be sin l'emettur ZDF perfin pli che 5,6 milliuns persunas guardà live.
E tuttina, il ballape da las dunnas è anc lunsch davent da quel dals umens quai che pertutga las cifras d’aspectaturas ed aspectaturs. Per exempel: Il final dal campiunadi europeic da las dunnas il 2022 han 50 milliuns persunas guardà live. Tar ils umens il 2021 han 328 milliuns guardà il final – pia passa 6 giadas dapli aspectaturas ed aspectaturs.
L’emprim campiunadi mundial era mo per umens. Il ballape da las dunnas è vegnì pir pli tard. Perquai dovra lez era anc in zichel temp per daventar tuttina famus.
Raschuns per questas cifras da televisiun dettia differentas, manegian las giugadras ed ils giugaders dal ballape regiunal dal Grischun. Intginas raschuns sajan pli giustifitgadas, ed autras pli pauc.
Las dunnas dattan tenor mai sin in fitg aut nivel. Sulet il tempo e l’exactadad dals pass èn magari in tema.
Betg las medemas schanzas
Vinavant saja la situaziun da partenza da daventar profi era tut in'autra tar las dunnas che tar ils umens. Buobs vegnian promovì e sustegnì bler pli baud ed intensiv che buobas. E malgrà ch'i haja ils davos onns dà in svilup en quest sectur, ston las dunnas savens anc lavurar dasperas e na pon betg sa focusar 100% sin il ballape sco ils umens.
Ils umens na fan l’entir di nagut auter che dar ballape – e tar las dunnas ston las bleras anc lavurar dasperas.
Far visiblas las dunnas en il mund dal ballape professiunal
Ton pli impurtant saja perquai ch'il ballape da dunnas vegnia visibel e survegnia plaz en las medias. Ina giuvna che dat tar il Team Surselva manegia, ella chattia questa visibilitad enorm impurtanta. Cunzunt per giuvnas buobas, ch'ellas vesian ch'i dat era stars da ballape ch'èn dunnas.
Da quest avis èn era ils umens che dattan cun passiun ballape. Vitiers vegnian las summas orrentas ch'i dat en il mund dal ballape – quellas hajan schon daditg cuntanschì ina surmesira.
Ils proxims onns stoi là schon vegnir fatg correcturas – ensi per las dunnas ed engiu tar ils umens.
Il tenor general tar las giugadras e tar ils giugaders dal ballape regiunal dumandads è – il ballape da dunnas dovra dapli sustegn. E cun in zichel pazienza speran las giugadras ed ils giugaders da las equipas grischunas ch'i vegnia a dar in anc pli grond svilup en favur dal ballape da las dunnas.