Siglir tar il cuntegn

Header

cuntegn

Campiunadi mundial En il quartfinal spetgan ils Stadis Unids

Al campiunadi mundial en Finlada cumenza la fasa decisiva: Gievgia han lieu ils quartfinals da las meglieras otg naziuns e tranter quellas è era la Svizra.

  • Germania – Tschechia
  • Svezia – Canada
  • Svizra – USA (las 19:20)
  • Finlanda – Slovachia

La fasa da k.o.

Avrir la box Serrar la box

Las meglras quatter equipas da la gruppa A e B sa qualifitgeschan per la runda finala.

  • Quartfinals: Gievgia, ils 26-05
  • Mezfinals: Sonda, ils 28-05
  • Final: Dumengia, ils 29-05

7. gieu: Victoria suenter penaltis

Er en il setavel gieu da gruppa ha l'equipa da Patrick Fischer fatg bler endretg e gudagnà il gieu cunter la Germania suenter sajettar penaltis cun 4:3. Suenter il temp regular eri pari 3:3, ils penaltis han stuì decider la partida. Uschia èn ils Svizzers sa qualifitgads da moda suverana sco victura da gruppa per il gieu da quartfinal.

video
Reto Berra: «Jau hai gugent la lutga da penaltis»
Or da Sport-Clip dals 24.05.2022.
abspielen. Laufzeit 1 minuta 40 Sekunden.

6. gieu: Proxima victoria cunter la Frantscha

A la naziunala svizra da hockey manca be anc in punct al campiunadi mundial en Finlanda, per restar a la testa da lur gruppa A. Suenter la victoria cun 6:3 encunter il Canada, han els battì la Frantscha cun 5:2, quai suenter ch'ils Svizzers èn stads l'entschatta dal gieu 0:2 en retard.

5. gieu: Victoria spectaculara cunter il Canada

La naziunala Svizra ha gudagnà cun 6:3 encunter il campiun mundial da record, il Canada. Gia avant il gieu era cler che l'equipa da Patrick Fischer cuntanschia il quartfinal, perquai ch'il Danemarc aveva battì la Frantscha cun 3:0.

Per Andres Ambühl hai dà dubla raschun per festivar. Tar la victoria encunter il Canada ha il Grischun rut il record cun ses 120avel gieu ad in campiunadi mundial. Quai restia en memoria e saja ina fin perfetga per quest di.

video
Svizra batta Canada cun bravura
Or da Sport-Clip dals 21.05.2022.
abspielen. Laufzeit 5 minutas 51 Sekunden.

4. gieu: La quarta victoria cunter la Slovachia

La squadra naziunala svizra ha gudagnà cun 5:3 cunter la Slovachia – malgrà blers chastis e blers sbagls. Uschia ha il team da Patrick Fischer era suenter la quarta partida il dumber maximal da puncts en la gruppa A, numnadamain 12 puncts.

3. gieu: Svizra gudogna cunter Kasachstan

La squadra naziunala svizra gudogna è la terza partida al campiunadi mundial a Helsinki en Finlanda. Il team da Patrick Fischer ha battì ils Kasacs cun 3:2. Ils Svizzers han bain dominà la partida - l'emprim gol è però pir crudà en il segund terz grazia a Denis Malgin. Cunquai ha la squadra naziunala fin ussa gudagnà tut ils trais gieus.

2.gieu: Svizra declassescha il Danemarc

Er sia segunda partida da gruppa al campiunadi mundial en Finlanda, ha la Svizra gudagnà, questa giada encunter il Danemarc. Dumengia saira ha la squadra dal trenader Patrick Fischer battì il Danemarc gist cun 6:0. La Svizra è uschia per il mument ensemen cun ils Canadais, cun il maximum da puncts al timun da la gruppa A.

1. gieu: Svizra gudogna cunter l'Italia

La Svizra ha gudagnà sia emprima partida al campiunadi mundial da hockey a Helsinki. Il team dal trenader Fischer ha gudagnà la partida cunter l'Italia cun 5:2. Malgin ha gia fatg l'emprim gol suenter 49 secundas. Ils ulteriurs gols han fatg Thürkauf (2), Ambühl e Hischier. Ils Talians han fatg ils gols en la davosa part dal gieu.

RTR novitads +

Artitgels legids il pli savens

Scrollar a sanestra Scrollar a dretga