Mujinga Kambundji è campiunessa mundiala sur ils 60 meters en la halla. A Belgrad ha ella meglierà il record svizzer – ch'ella tegneva ensemen cun Ajla Del Ponte – per 7 tschientavels sin 6,96 secundas. Sin plaz 2 è l'Americana Mikiah Brisco, sin plaz 3 sia cumpatriota Marybeth Sant-Price.
Terza medaglia ad in'occurrenza gronda
Per la Bernaisa da 29 onns èsi la terza medaglia ad in'occurrenza gronda – l'emprima dad aur. Al campiunadi mundial dal 2019 a Doha è ella vegnida terza sur 200 meters ed er al campiunadi mundial dal 2018 a Birmingham aveva Kambundji gudagnà bronz sur 60 meters en la halla.