Per omadus talents da skis ch'èn omadus la segunda stagiun en il Cader C da la Svizra, èsi stà l'ultima schanza da pudair ir ina giada ad in campiunadi mundial dals juniors. Omadus cumpleneschan quest onn lur 21avel anniversari. Suenter n'èn els betg pli juniors. Entant che Gino Stucki metta en quella stagiun cumplain sin la disciplina slalom èn las disciplinas da Silvano Gini il slalom gigant ed il super-G.
Mais difficils per Silvano Gini
L'onn passà ha la stagiun da l'Engiadinais prendì ina fin abrupta. Il schaner ha el gì ina ruttadira vid in pe. Succedì durant in trenament da speed. Silvano Gini è, l'emprima giada en sia carriera anc giuvna, vegnì franà ed ha duvrà pli ditg pazienza che pensà. Tar ses comeback il november ha el gist fatg il sigl sin il podest, sco segund en in slalom gigant da la FIS. Era en la cuppa europeica, nua che la concurrenza è enorma, ha el dumagnà tranter ils top 30.
Ses grond siemi è d'arrivar en la cuppa mundiala da skis. Savend che quai grategia be als paucs. Ma quella finamira motivescha da trenar dir, di per di. Uss sa legra el sin l'aventura campiunadi mundial dals juniors e da pudair sa mesirar cun atlets da tut il mund. A St. Anton ha Silvano Gini ses plazs da partenza fixs en il slalom gigant ed en il super-G.
Gino Stucki ha stuì tremblar per la WM
Che la selecziun per il campiunadi mundial è ditg stada sin ballantscha ha da far cun la constanza che ha mancà quest enviern a Gino Stucki. En plirs slalom da la FIS è el crudà ora, u en l'emprim ni en il segund percurs. Quai haja surtut da far cun sia grondezza, cun ses 1,91 tutga el tar ils gronds atlets en la disciplina slalom.
Tuttina, dumogna Gino Stucki dus percurs tochen en l'arrivada tutga el tar ils svelts. Trais giadas en ils top 10 tar slalom da la FIS, ina giada sin il podest sco terz. Quai ha la finala tanschì per la cuppa mundiala ch'el ha gì avisà sco gronda finamira quella stagiun. E clera, era il giuven da Flond ha il siemi da turnar en patria cun ina medaglia.
E suenter il campiunadi mundial dumagnar da pudair parter ad inqual cursa da la cuppa europeica, tge ch'è indispensabel per sia gronda finamira: cursas en la cuppa mundiala.
CM da skis juniors a St. Anton dals 16 fin ils 25 da schaner 2023.
