La Spagna gudogna per l’emprima giada il campiunadi mundial. En il final a Sydney battan ellas l'Engalterra cun 1:0.
Las Spagnolas èn stadas la meglra squadra en l’emprima mesadad, en la 29avla è lura gartegià il 1:0 a la chapitania Olga da Real Madrid. Curt avant la pausa han las Englaisas lura gì fortuna, Salma Paralluelo tira vi da post.
Segunda mesadad dramatica
Suenter duas substituziuns en la pausa han las Englaisas lura dapli dal gieu. Suenter in pau sur in’ura lura dentant ina scena dramatica en il zona da penalti da l’Engalterra: la balla tutga il maun da Keira Walsh. Suenter consultar il VAR decida l’arbitra da dar in penalti a la Spagna. Jennifer Hermosa n’è dentant betg stada buna da decider il gieu, Mary Earps parescha il tir plitost debel.
Er cun las 13 minutas prolungaziun ch’i ha dà pervi da pliras interrupziun n’èn las liunessas betg pli stadas bunas d’egualisar. Cun quai scrivan las Spagnolas istorgia e gudognan las per l’emprima giada il campiunadi mundial.
La Svezia gudogna il final pitschen
En il pitschen final da sonda, battan las favuritas da la Svezia la sensaziun dal turnier da l'Australia. Las Australianas han cun quai pers suenter il mezfinal cunter l'Engalterra lur segunda partida al turnier a chasa. Las Svedaisas han survegnì in penalti en las 30avla minuta, suenter che Fridolina Rolfö ha convertì quel, ha Kosovare Asllani decidì il gieu cun il 2:0 suenter ina cumbinaziun attractiva.
