Swiss Cycling ha nominà 44 atletas ed atlets per quest campiunadi mundial en il sid dal Lai da Genevra betg lunsch davent dal cunfin svizzer. Tranter auter van er a la partenza otg grischuns.
En la categoria d’elita èn quai ils dus mountainbikers oriund da Tersnaus, Nino Schurter e Vital Albin. En la categoria d’U23 Ginia Caluori da Panaduz e Janis Baumann dad Igis ed en la categoria dals juniors sut 19 onns Lorena Cadalbert da Cuira, Anina Hutter da Trimmis, Chiara Solèr da Lumbrein e Mauro Hassler da Cuira.
In siemi che va en vigur
Per Chiara Solèr va in siemi uschia en vigur. Per la giuvna da 17 onns è quai ina premiera ad in campiunadi mundial. Ella haja trenà fitg las davosas emnas e saja pronta per la pli impurtant cursa da la stagiun, uschia Chiara Solèr, ch’ha gist cumenzà ses segund onn dal emprendissadi mercantil ch’ella po far sin chanzlia da la vischnanca Lumnezia.
Da vesair l’agen num sin ina glista cun Nino Schurter u Jolanda Neff è fitg spezial. Propi realisà ch’jau poss ir al campiunadi mundial n’hai jau anc betg.
Grazia al sustegn da la vischnanca, mo er da sia equipa da Thömus e principal da la famiglia, è Chiara Solèr sin buna via da far carriera en il sport da mountainbike. Il grond siemi è da gudagnar in di ina medaglia olimpica u ina medaglia ad in campiunadi mundial. Discurrer d’ina medaglia a Les Gets è anc in zic baud, er perquai ch’ella è cun ses 17 onns ina da las pli giuvnas en la categoria da las junioras. Ella veglia simplamain mussar ina buna cursa en Frantscha, vegnir atras senza cupitgar u defects e sche pussibel cuntanscher l’arrivada tranter las meglras 20.
Nino Schurter a la chatscha da ses 10avel titel
Il grond trumf svizzer a Les Gets è ina giada dapli Nino Schurter. El parta sco defensur dal titel. Schurter ha la schanza da gudagnar ses 10avel titel da la carriera. Bunas cartas ha er il Tessinais Filippo Colombo ch’ha gudagnà bronz al campiunadi d’Europa. Siemiar d’ina medaglia, sche tut grategia sco giavischà, astga er Vital Albin. Il grond favurit è perencunter il Brit Thomas Pidcock, il campiun olimpic da Tokyo e campiun europeic da Minca.
Tar las dunnas valan Jolanda Neff, la campiunessa olimpica, ed Alessandra Keller sco grondas favuritas. Betg emblidar dastgan ins Sina Frei che veva gudagnà al davos campiunadi mundial a Val di Sole aur en il short track e bronz en la cursa roiala da cross country. Las favuritas èn perencunter Loana Lecomte e Pauline Ferrand-Prévot che vulan triumfar a lur campiunadi mundiala da chasa.
Senza Mathias Flückiger
Betg a la partenza è Mathias Flückiger. Il Bernais è il mument suspendì provisoricamain suenter sia prova positiva sin doping. A Flückiger smanatscha in chastì da plirs onns. Avant in onn veva il vice-campiun olimpic da Tokyo gudagnà davos Nino Schurter la medaglia d’argient al campiunadi mundial.
Segn da dumonda tar Camille Balanche
En las cursas da downhill vala Camille Balanche sco ina da las grondas favuritas, er perquai ch’ella ha gudagnà en questa stagiun trais cursas da la cuppa mundiala. Il 2020 aveva Balanche gia gudagnà aur. Quest onn parta el dentant cun in handicap. L’entschatta dal mais è Camille Balanche cupitgada e rut il clavigl.
Program da cursas
Mesemna:
- 12:30 uras: Team Relay da cross-country
Gievgia:
- 15:00 uras: junioras U19 cross-country
- 17:00 uras: juniors U19 cross-country
Venderdi:
- 10:00 uras: dunnas e-mtb
- 11:30 uras: umens e-mtb
- 17:00 uras: dunnas d’elita cross-country short track
- 17:45 uras: umens d’elita cross-country short track
Sonda:
- 09:30 uras: junioras e juniors downhill
- 13:15 uras: dunnas d’elita downhill
- 14:35 uras: umens d’elita downhill
Dumengia:
- 09:00 uras: dunnas U23 cross-country
- 10:45 uras: umens U23 cross-country
- 13:00 uras: dunnas d’elita cross-country
- 15:15 uras: umens d’elita cross-country
