Cun 37 onns è Andres Amübhl, u il Büehli sco el vegn numnà, sa chapescha in dals seniors. Malgrà sia vegliadetgna e ses be 1.76 meters è el però anc adina in giugader che gioga ina rolla centrala en il cader da Patrick Fischer. E cun sia rutina, sia experientscha vul Ambühl er ir ordavant cun in bun exempel.
A la fin na dependi betg da la vegliadetgna, mabain da quai ch’ins mussa sin il glatsch. E sin il glatsch hai jau il sentiment, ch’jau na sun anc betg uschè vegl.
Tut en tut ha il trenader naziunal Patrick Fischer nominà 28 giugaders per quest campiunadi mundial 2021, tranter quels er in trio dal HCD. Sper Andres Ambühl èn quai era ils attatgaders Enzo Corvi e Fabrice Herzog.
A la chatscha d’ina medaglia
La finamira da la naziunala Svizra è da turnar a chasa cun ina medaglia, sco gia il 2013 da Stockholm ed il 2018 da Kopenhagen. Tar omadus turniers avevan ils Svizzers cuntanschì il final, dentant mintgamai pers quels cunter ils Svedais. Quai è lura er gist in dals set adversaris en la fasa da gruppa. Plinavant fruntan ils Svizzers er sin la Russia e la Tschechia.
Plan da gieu naziunala svizra (fasa da gruppa)
- 22-05-2021 a las 19:15 uras Svizra – Tschechia
- 23-05-2021 a las 19:15 uras Svizra – Danemarc
- 25-05-2021 a las 19:15 uras Svizra – Svezia
- 27-05-2021 a las 15:15 uras Svizra – Slovachia
- 29-05-2021 a las 15:15 uras Svizra – Russia
- 30-05-2021 a las 15:15 uras Svizra – Bielorussia
- 01-06-2021 a las 11:15 uras Svizra – Gronda Bretagna
64 gieus a Riga
Il campiunadi mundial da hockey 2021 cumenza venderdi, ils 21 da matg. Il final è la dumengia, ils 6 da zercladur. Tut ils 64 gieus han lieu a Riga, la citad principala da la Lettonia a l’ur da la Mar da l’Ost. Previs era da manar atras quest turnier a Riga ed a Minsk. Pervi da la situaziun politica instabila en la Bielorussia suenter la reelecziun dispitaivla dal president Alexander Lukaschenko, ha la Federaziun internaziunala da hockey dentant, er sut squitsch da la regenza lettona, stritgà Minsk mez schaner da la glista.
Avant in onn è il campiunadi mundial da hockey ch’avess gì lieu en Svizra, a Turitg e Losanna, stà in’unfrenda da la pandemia da corona. Malgrà il coronavirus po uss suenter dus onns dentant puspè vegnì cumbattì per medaglias da hockey. L’onn proxim spetgan lura sper il campiunadi mundial en la Finlanda era ils proxims gieus olimpics a Peking.