Pervia da la pandemia da corona era il campiunadi mundial da hockey sut 20 onns vegnì spustà dal december sin l’avust. Suenter emnas intensivas da preparaziun ha la squadra naziunala sut 20 onns lura fatg il viadi en il Canada e pers las emprimas trais partidas da gruppa cunter la Svezia, ils Stadis Unids e la Germania. Pir la davosa partida da gruppa cunter l’Austria ha la Svizra gudagnà ed uschia fatg il pass en il quartfinal. Là spetgava il Canada.
Nus vain fatg in bun job ad Edmonton. Nus avessan dentant pudì gudagnar dapli gieus.
Pers cunter il grond favurit
Il duel cunter il Canada è adina spezial. L’equipa naziunala canadaisa sut 20 onns vala sco grond favurit per il titel en l’agen pajais. Avant in onn e mez aveva la Svizra anc pers cleramain cun 0:10 cunter il Canada. Uss ha l’equipa dal trenader Marco Bayer pudì tegnair avert la partida pli ditg. En l’emprim terz era la Svizra anc cumpetitiva. Suenter l’emprim gol dals Canadais ha la naziunala pudì egualisar il gieu. Er suenter il 2:1 era la partida anc averta. Pir lura èn ils Canadais ids cun trais gols en avantatg.
Fabian Ritzmann è cuntent cun la prestaziun
L’attatgader engiadinais dal SC Berna ha pudì prender part per l’emprima giada ad in campiunadi mundial sut 20 onns. Pervia ch'il giugader da Scuol è vegnì il schaner 20 onns è quai er ses davos campiunadi mundial sin quest stgalim da vegliadetgna. Ritzmann è cuntent cun la prestaziun tar quest campiunadi mundial. Ils gieus da gruppa cunter la Svezia e la Germania èn ids a fin be cun in gol differenza. Ed er cunter il Canada ha la naziunala mussà ina buna prestaziun. Pervia ch’il campiunadi mundial è vegnì spustà sin l’avust è l’attatgader gia uss pront per la nova stagiun da hockey. Quai, e surtut er tut las experientschas ch’el ha pudì far en il Canada, al gida segir enavant.