La stagiun d'enviern cun il tir endadens è ida a fin sonda e dumengia passada. Per conclusiun da quella èn las campiunessas ed ils campiuns svizzers vegnids eruids. Tranter quellas e quels ch'èn stads sisum il podest è era Alicia Beer da Rueras en Val Tujetsch. Per la Tuatschina è quai in ulteriur grond success en sia anc giuvna carriera en il sport dal tir.
Igl ha duvrà gnerva
Suenter ch'il campiunadi svizzer avant in onn n'è betg reussì ad Alicia Beer tenor giavisch, è ella sa messa cun in zichel gnervusitad en il stan da tir la fin d'emna passada a Berna. Bain savend ch'ella saja en buna furma è ella tuttina stada optimista. Cun 626,4 puncts (60 culps) ha ella gudagnà la qualificaziun ed uschia mussà sia ambiziun. Sco tar tuttas autras categorias èn era en quella da las junioras sut 21 onns las otg meglras sa qualifitgadas per il final. En lez è vegnì sajettà tenor il sistem da ko. Quella cun il pli nausch resultat suenter dudesch culps è crudada mintgamai ora da la concurrenza e silsuenter mintgamai ulteriuras suenter dus culps. A la fin finala èn restadas duas tiraduras en il final dal final ed en quel ha Alicia Beer defendì l'avantag e gudagnà la concurrenza cun 247,5 puncts ed in avantag da 0,4 puncts avant Maya Leicht dal chantun Sviz.
Sa meglierada successiv
Schebain che la partenza el final na saja betg reussida cumplainamain ad Alicia Beer, è ella sa lavurada successivamain da la rangaziun siadora. Uschia po Alicia Beer, ch'appartegn al cader naziunal da junioras e juniors da Swiss Shooting, terminar la stagiun cun in success cumplain. Per pudair sa deducir cumplainamain al sport da tir vegn ella betg mo sustegnida da sia famiglia, mabain era da sponsuras e sponsurs da la regiun.