Er sch’i va vers la primavaira, sa transfurman las pistas a Corviglia sur San Murezzan anc ina giada en pistas da cursa. Dapi la mesemna, e fin la dumengia cumbattan skiunzas e skiunzs al campiunadi svizzer. Er sche las topatletas ed ils topatlets piglian quest’occurrenza pli luc, haja l’organisaziun tuttina d’esser professiunala, di Flurina Maier, la scheffa dal biro da cursa.
-
audioLa scheffa dal biro da cursa Flurina Maier02:49 min, ord Actualitad dals 24.03.2022.laschar ir. Durada: 2 minutas 49 Secundas. -
audioDiscurs cun il mainacursa Robin Miozzari04:54 min, ord Actualitad dals 24.03.2022.laschar ir. Durada: 4 minutas 54 Secundas. -
audioL'atmosfera a l'ur da la pista da cursa04:11 min, ord Actualitad dals 24.03.2022.laschar ir. Durada: 4 minutas 11 Secundas.
Infrastructura minimala
Auter che tar las cursas da la cuppa mundiala che vegnan organisadas il december a San Murezzan, èn ils responsabels sa decidids per in’infrastructura minimala. Tenor Flurina Maier han ins pia decis da betg fabritgar si la tribuna ed er il visur grond en il territori da l’arrivada n'è betg installà. La squadra d'organisaziun na spetga numnadamain betg bleras aspectaturas ed aspectaturs.
Program dal campiunadi svizzer
mesemna, ils 23 da mars:
cursa rapida dals umens
cumbinaziun alpina da las dunnas
gievgia, ils 24 da mars:
cursa rapida da las dunnas
cumbinaziun alpina dals umens
venderdi, ils 25 da mars:
super-G umens e dunnas
sonda, ils 26 da mars:
slalom gigant dals umens
slalom da las dunnas
dumengia, ils 27 da mars:
slalom gigant da las dunnas
slalom dals umens
Pistas da cursa
La preparaziun da la pista è ina gronda sfida. Las temperaturas autas laschan smarschir spert la naiv. Perquai han ins d’elavurar la pista cun sal. Tras quai vegn sbassà il punct da schelira e la vetta il pli sisum lieua. Per che la pista tegna propi per tut las var 160 atletas ed atlets, hajan ins er fixà il temp da partenza gia baud la damaun, uschia che las cursas èn a fin vers mezdi.
