Durant 13 dis èn noss redacturs stads al puls da Planica. Sutvart chattais diversas istorgias che dattan in'invista davos las culissas dals campiunadis mundials nordics.
I ha duvrà ditg fin ch'ils fans èn vegnids a Planica
10 dis han ils fans a Planica duvrà per chattar la via tar las concurrenzas. Per l’emprima giada ha regì il venderdi in'atmosfera da festa a Planica. Spezialmain durant il siglir cun skis han ils fans slovens fatg gronda canera.
Forsa ha quai era da far cun il fatg ch’ils organisaturs han regalà bigliets gratuits a fans. Da cumparegliar cun anteriurs campiunadis mundials en la Finlanda, la Norvegia u en l’Austria – n'è l’atmosfera e la massa fans dentant anc adina betg.
10 dis èsi stà fitg quiet a l'ur da la loipa
Ils campiunadis mundials da ski nordic èn senza dubi il punct culminant da la stagiun per passlunghistas e passlunghists. Atletas ed atlets ston dentant cumbatter a Planica per las medaglias quasi avant tribunas vitas. Las massas da fans mancan. Ils Scandinavs n’èn per ina giada betg vegnids en rotschas sco ad auters campiunadis mundials. Ina raschun è ch’ils pretschs èn fitg auts a Planica. Ils hotels han pretschs orrents e per ina charta dal di a las occurrenzas da sport èsi da pajar almain 60 euros.
Betg mo sin las tribunas a Planica na curra betg bler. Il medem vala er per il vitg da Kranjska Gora, nua che las ceremonias da medaglias han lieu la saira. Il travasch è fitg pitschens durant las ceremonias. Ed er durant ils concerts che han lieu quasi mintga saira sa perdan mo paucas persunas avant la tribuna.
La Slovenia – il pajais dals urs
Strusch in'auter pajais sin il mund ha, proporziunalmain, uschè blers urs sco la Slovenia. Sin ina surfatscha, mez uschè gronda sco la Svizra, vivan bun 1'000 urs. Il motiv per quai è che 62% dal pajais è guaud. En la regiun da Kranjska Gora / Planica n'è l'urs dentant betg in grond tema da discussiun. Ils urs èn spezialmain da viadi en il sid dal pajais sin il cunfin cun la Croazia. Tar els dettia pli bleras discussiuns davart il luf, han intgins umens ditg envers RTR. Noss redactur Gian Carlo Candinas è sa sentì in zic sco vi d'ina maisa radunda en Svizra cura ch'igl è vegnì discurrì davart il luf.
Norvegiais dattan en il tun
Durant ils emprims dis dals campiunadis mundials èsi cler tge fans che domineschan. Malgrà ch'i ha pli paucs fans che ad auters campiunadis mundials, èn ils Norvegiais quels che fan la gronda canera. «Nus essan naschids cun skis da passlung» dian blers dad els.
In emprim star secret dals campiunadis mundials datti era gia. Numnadamein l'imni da Planica che va si e giu sin l’areal da fans tranter l’arena da passlung e las schanzas da siglir cun skis.
Impressiuns
-
Bild 1 von 14. Probabel il pli spectacular fan als campiunadis mundials a Planica. Bildquelle: RTR.
-
Bild 2 von 14. Envers la fin dals campiunadis mundials crescha l'atmosfera a Planica. Bildquelle: RTR.
-
Bild 3 von 14. Ina gruppa seniors da la Norvegia giauda il temp en Slovenia. Bildquelle: RTR.
-
Bild 4 von 14. Ils Norvegiais èn vegnids en roschas a Planica. Bildquelle: RTR.
-
Bild 5 von 14. Ils Slovens èn da chattar savens datiers las schanzas da siglir cun skis. Bildquelle: RTR.
-
Bild 6 von 14. Els sajan Austriacs che tegnan er per la Slovenia, ma atgnamain er per la Norvegia. Bildquelle: RTR.
-
Bild 7 von 14. Cunquai che Planica è datiers dals cunfins austriacs, èn er numerus Austriacs als campiundis mundials. Bildquelle: RTR.
-
Bild 8 von 14. Martin venda products regiunals a Kranjska Gora e giauda d'avair buna cumpagnia. Bildquelle: RTR.
-
Bild 9 von 14. Lana e Grega èn apiculturs passiunads en la regiun da Planica. Bildquelle: RTR.
-
Bild 10 von 14. Ziga è grond fan da sport ed er losch sin ils atlets slovens en ils differents sports. Bildquelle: RTR.
-
Bild 11 von 14. Las cursas da passlung han lieu avant ina culissa magnifica. Bildquelle: RTR.
-
Bild 12 von 14. Qua han las concurrenzas da siglir cun skis lieu. Bildquelle: RTR.
-
Bild 13 von 14. Il sulegl e las temperaturas migiaivlas han Andreas Wieland e Gian Carlo Candinas prendì dal Grischun a Planica. Bildquelle: RTR.
-
Bild 14 von 14. Il vitg da Kranjska Gora. Bildquelle: RTR.
Ils Slovens – ospitants e loschs
Kranjska Gora è il pli grond vitg en la regiun da Planica, ed igl è era il lieu nua che las ceremonias da medaglias èn durant ils campiunadis mundials. Durant in pitschen gir tras il vitg han noss redacturs emprais d'enconuscher in zic il pievel sloven. Cunquai che la regiun da Planica è datiers da l'Austria discurra ina gronda part da la populaziun er in zichel tudestg.
Gian Carlo Candinas ha discurrì cun apiculturs passiunads, cun in giuven che giauda d'avair buna cumpagnia, dentant er cun in um sloven ch'ha na betg vulì dar in'intervista cunquai che noss redactur na discurra betg sloven.
Planica – ils campiunadis da trais pajais
Ils campiunadis mundials da ski nordic a Planica 2023 èn il pli grond eveniment da sport en l'istorgia da la Slovenia. Radund 200'000 aspectaturs ed aspectaturas vegnan spetgads durant las proximas duas emnas. Per cumparegliar: Als campiunadis mundials da ski alpin a Courchevel/Meribel èn 150'000 fans stads da la partida.
Ils campiunadis mundials a Planica èn era in zic campiunadis da «trais pajais». Planica è numnadamain en ina regiun da trais pajais cunfinants. Ils cunfins da l'Austria sco er quels da l'Italia èn mo paucas minutas cun auto davent da Planica. Uschia èn ils atlets da passlung svizzers durant il campiunadi mundial en in hotel en l'Italia, blers schurnalists en l'Austria e las concurrenzas èn apunta en Slovenia.