Siglir tar il cuntegn

Header

cuntegn

Campiunadis mundials Cun Carlo na san ins mai

Oz èsi exact 12 onns che Carlo Janka è vegnì campiun mundial a Val d'Isère. Ses bab Reto sa regorda da quai di dad aur. In onn suenter il titel da campiun olimpic. Ed uss Cortina, ch'è gia sia 10avla occurrenza gronda.

Ils dis dad aur èn anc fitg preschents

En l'ustaria dals Jankas a Sursaissa-Miraniga èn tut ils success da Carlo Janka fitg preschents. En ina vitrina pon ins contemplar las medaglias dad aur, quella da bronz, la culla gronda da cristagl ed ina pitschna, las bleras trofeas da Wengen ed il chamutsch da bronz da Kitzbühel. Bab Reto ha era rimnà blers artitgels da gasetta e commentaris.

video
Ord l'archiv: Festa da giubileum per Carlo Janka
Or da RTR Social dals 13.02.2021.
laschar ir

Carlo n'haja mai legì quai che saja vegnì scrit sur dad el, raquinta Reto Janka e sa regorda anc fitg bain dals pli emprims campiunadis mundials da ses figl, l'onn 2009 a Val d'Isère. E surtut era da l'entira truscha mediala suenter il triumf – cura che tut vuleva udir e savair dapli dal Sursilvan che vegn cun 22 onns campiun mundial en il slalom gigant.

audio
Il di dad aur da Carlo Janka
04:07 min, Actualitad dals 13.02.2021.
laschar ir. Durada: 04:07 minutas.

Pudess Cortina esser ses ultim CM?

Reto Janka è stà a tut ils sis campiunadis mundials da ses figl. Era a Cortina d'Ampezzo fiss el stà gugent sper la pista. Era sch'ins sa il pli tard dapi ses triumfs che Carlo n'è betg quel dals gronds pleds, haja el adina apprezià la preschientscha dals fans.

Carlo Janka ha entant 34 onns. Suenter ses onns dad aur 2009 e 2010 èn bain ulteriuras victorias e podests vegnids vitiers. Ma era problems da sanadad che frainan adina puspè. Sur onns ferm en quatter disciplinas, lubescha ses dies en questa stagiun mo da parter en las cursas rapidas. En las ultimas avant Cortina hai dà dus 6avels plazs a Kitzbühel ed a Garmisch. Tge ch'è pussaivel al CM saja grev dir, manegia schibain ses bab sco era ses frar Pirmin. Cun Carlo na sappian ins mai. Ed era betg sche Cortina saja eventual ses ultims campiunadis mundials. Tut dependia era da ses dies.

audio
Tge è pussaivel a ses 7avel CM
03:06 min, Actualitad dals 12.02.2021.
laschar ir. Durada: 03:06 minutas.

RTR actualitad 08:00;

Artitgels legids il pli savens

Scrollar a sanestra Scrollar a dretga