Ils campiunadis mundials da junioras e juniors e da la categoria sut 23 onns èn in emprim punct culminant en las carrieras giuvnas da passlunghistas e passlunghists. Durant quests campiunadis mundials ha ins il congual direct cun la concurrenza internaziunala. Anc pli fitg sco en la cuppa d’Europa da passlung u alura tar cursas regiunalas da la FIS. Perquai èn campiunadis mundials da junioras e juniors uschè impurtant. Quest onn èn ils campiunadis mundials dals stars futurs da passlung a Planica en Slovenia.
19 giuvnas atletas ed atlets svizzers
La federaziun Svizra da skis, Swiss Ski, ha nominà 19 atletas ed atlets per quest campiunadis mundials en las categorias da juniors e sut 23 onns. Ina buna part da questas atletas ed atlets derivan dad Engiadina Nordic, dal cader da passlung regiunal en Engiadin'Ota. Gist sett dad els èn da la partida tar ils campiunadis mundials e vulan far là ina buna figura. L'auta quantitad da passlungistas e passlungists Engiadinais ch’èn da la partida en Slovenia mussa ch'ins fa buna lavur en la regiun.
Nus avain bunas premissas en l'Engiadin'Ota e nus avain fatg ils davos onns blera lavur per far vegnir questas premissas anc meglras.
Tuts han da trair vi da la medema suga
Ina carriera da passlung sco per exempel quella da Dario Cologna cumenza l’emprim en la famiglia. Sch'ils geniturs promovan il plaschair dals uffants da far sport, ni passlung, alura vegnan els forsa en ina gruppa da trenament da giuventetgna e sport. Da là forsa en in cader regiunal, ed uschia vinavant. Fitg bleras giuvnas e giuvens arrivan alura x-ina giada en il cader regiunal dad Engiadina Nordic. Quel cader datti dapi passa 30 onns e durant ils ultims trais decennis ha il cader fatg in enorm svilup. Quai ch'ha cumenzà fitg pitschen e simpel è creschì e vegnì adina pli professiunal. Oz treneschan per exempel diesch trenaders professiunals las giuvnas atletas ed atlets.