Schurter ha smatgà a Glentress Forest, radund 15 kilometers en il sid dad Edinburgh, sin il tempo a partir dal sajet da partenza ed uschia procurà ch’in concurrent suenter l’auter ha stuì ceder, cun excepziun dal campiun olimpic Tom Pidcock.
Rangaziun:
- Thomas Pidcock (GBR), 1:22,09 uras
- Samuel Gaze (NZL), +19 secundas
- Nino Schurter (SUI), +34 secundas
En la 6avla dad 8 rundas ha Nino Schurter lura betg pli pudì star sin ils chaltgogns a Pidcock ch’ha anc absolvì dacurt per la segunda giada en sia carriera il Tour de France. Durant ch’il matadur local è stà sin via a ses emprim titel da campiun mundial, ha Nino Schurter a la fin schizunt stuì tremblar per ina medaglia. Sco emprim ha Sam Gaze, il campiun mundial dal short-track, surpassà il Lumnezian e silsuenter ha Schurter anc sentì il flad da Victor Koretzky. Il Franzos ha Schurter però pudì tegnair sin distanza ed uschia gudagnà bronz.
Cursa gia baud a fin per Van der Poel
Betg pudì cumbatter per ina medaglia ha Mathieu van der Poel. L’Ollandais che leva gudagnar quest onn dasper il titel da campiun mundial sin via era quel dal ciclissem champester è gia cupitgà en l’emprima runda. En in storta simpla è il ciclist da 28 onns glischnà e stà per terra. Curt suenter ha Van der Poel dà si la cursa.
Vital Albin sut ils top 15
Ina buna prestaziun ha sper Nino Schurter era Vital Albin mussà, l’auter mountainbiker da Tersnaus. El è vegnì 14avel cun in retard da 2:13 minutas ed uschia stà classà in plaz pli enavant ch’als davos campiunadis mundials avant in onn a Les Gets en Frantscha.
In plaz da top 10 hai dà per Lars Forster ch’è vegnì 8avel. Insumma betg ì sco giavischà èsi a Mathias Flückiger. El ha pers gia a la partenza il contact cun la gruppa da testa e la finala stuì sa cuntentar cun il 12avel plaz. Marcel Guerrini è vegnì 16avel, Joel Roth 21avel e Thomas Litscher ch’è cupitgà gia baud en la cursa è la finala vegnì 22avel.
