Siglir tar il cuntegn

Header

cuntegn

Campiunadis svizzers a Sedrun Van der Graaff gudogna titel da sprint

Beda Klee da Wattwil en il chantun Son Gagl e Laurien van der Graaff da Tavau han gudagnà a Sedrun il titel da campiun svizzer 2021 en il sprint ch'è vegnì manà atras quest onn en il stil classic.

Laurien van der Graaff ha gudagnà la cursa da sprint en la categoria d’elita da las dunnas avant las duas Tudestgas Pia Fink e Sofie Krehl. Nadine Fähndrich è vegnida sco segund-meglra Svizra 5avla. En il final cun las meglras sis è Fähndrich dentant crudada curt suenter la partenza e n’ha silsuenter gì naginas schanzas da gudagnar il titel. Il podest dals campiunadis svizzers ha cumplettà Désirée Steiner da Tavau ch’ha terminà la cursa da sprint sin il plaz 7.

Tar las junioras U18 ha Siri Wigger triumfà, tar las junioras U20 Anja Weber.

Dario Cologna gudogna bronz

Per la gronda surpraisa ha Beda Klee procurà. Il passlunghist dal Toggenburg ha gudagnà la cursa da sprint tar ils umens d’elita avant il grond favurit Jovian Hediger. Klee ha battì Hediger en in sprint final, quai sin ils davos meters. La medaglia da bronz gudogna Dario Cologna.

da san. Jovian Hediger (2.), Beda Klee (1.) e Dario Cologna (3.)
Legenda: da san. Jovian Hediger (2.), Beda Klee (1.) e Dario Cologna (3.) Stefan Schwenke

Tar ils juniors U18 ha Ilan Pitier triumfà, tar ils juniors U20 Nicola Wigger. L'indigen Cla-Ursin Nufer è vegnì 6avel tar ils juniors sut 20 onns.

Program da la fin d'emna

La sonda cuntinueschan ils campiunadis svizzers a Sedrun cun las cursas da distanza en il stil classic. La dumengia van ils campiunadis svizzers 2021 a fin cun la cursas da sprint d’equipa. Dario Cologna parta en questa cursa ensemen cun ses frar Gianluca Cologna.

RTR Actualitad 17:00

Artitgels legids il pli savens