Siglir tar il cuntegn

Header

cuntegn

Campiunadis svizzers passlung A la fin da la stagiun anc ils campiunadis svizzers a Silvaplauna

L’elita dal sport da passlung svizzer s’inscuntra a Silvaplauna per las ultimas cursas da la stagiun. Tar il campiunadi svizzer cumbattan las meglras atletas ed ils megliers atlets svizzers en il sprint, sur 30, respectiv sur 50 kilometers ed en il sprint d’equipa per ils ultims titels.

Durant trais dis stattan las loipas enturn Silvaplauna en il center dal campiunadi svizzer da passlung. En il sprint, dentant era sur la distanza lunga ed il sprint d’equipa vegnan curunadas e curunads ils ultims campiuns svizzers. Campiunadis a la fin dad ina lunga stagiun dattan als atlets ed atlets anc ina giada l’occasiun da mussar bunas prestaziuns. Ni da far bun anc insatge sche la stagiun n'è betg grategiada uschia sco ins ha mess avant quai. Bunas prestaziuns tar las ultimas cursas da la stagiun èn sa chapescha era la meglra motivaziun per cumenzar lura ils lungs mais da trenament durant la stad.

audio
Giuliana Werro avant mastranzas svizras da passlung
ord Actualitad dals 30.03.2023. Maletg: RTR
laschar ir. Durada: 3 minutas 12 Secundas.

Cursas da chasa per passlunghistas e passlunghists indigens, e per Giuliana Werro

Sin las loipas da chasa cumbattan surtut atletas ed atlets dal center da passlung Engiadina Nordic. Numerus giuvens sportists dal center da passlung van a la partenza. Engiadina Nordic è er quest enviern stà il center da passlung cun il pli grond success da l’entira svizra. Marina e Nadja Kälin da San Murezzan han per exempel gudagnà medaglias da bonz tar ils campiunadis mundials da juniors en il Canada, u Alessia Laager da Samedan ch'è vegnida vice campiunessa mundiala da biatlon en la categoria da vegliadetgna sut 18 onns.

Tar l’elita vegnan ils egls ad esser drizzads sin la victura dal Maraton da skis engiadinais, Giuliana Werro. La passlunghista da Zernez vul anc ina giada dar gas e mussar en il sprint, dentant surtut era tar la cursa da distanza sur 30 kilometers ina buna prestaziun.

Reciclar naiv per mastranzas svizras da passlung

Las mastranzas svizras da passlung ch’han lieu la fin d’emna a Silvaplauna furman gist er la fin da la stagiun d’enviern per ils sportists e las sportistas. Suenter ina stagiun cun pauca naiv, avevan ils organisaturs gì da temair la preparaziun da las loipas surtut anc l’emna passada cun temperaturas fitg autas.

Empè da laschar ir quels mantuns da naiv simplamain da l’aua giu, duvrain nus quels per optimar la preparaziun da la loipa a Silvaplauna.
Autur: Menduri Kasper president CO Mastranzas Svizras da passlung

La naiv frestga dals ultims dis haja salvà la situaziun, uschia il president dal comité d’organisaziun da las Mastranzas svizras da passlung, Menduri Kasper. Ultra da quai hajan els ramassà naiv deponida da differents lieus.

audio
Menduri Kasper davart las sfidas dal CS da passlung
ord Actualitad dals 30.03.2023. Maletg: RTR
laschar ir. Durada: 3 minutas 1 Secunda.

RTR actualitad 08:00

Artitgels legids il pli savens