Var 4'000 atletas ed atlets giuvens da tut l'Europa èn s'inscuntrads quest'emna a Skopje, en la Macedonia dal Nord, al «European Youth Olympic Festival» (EYOF). L'occurrenza vala sco mini-olimpiada per giuvenils tranter 14 e 18 onns. A la partenza per la Svizra è stada Leni Uffer, che ha fatg il slalom da canu. Ella n'ha betg mo cuntanschì il final, mabain era prendì a chasa in'experientscha preziusa.
Igl propi cool. Nus essan en in hotel cun anc autras naziuns ed ins va adina ensemen a mangiar. Igl è era pussibel da guardar ils auters sports, là vesan ins propi dal tut.
Leni Uffer è oriunda da Cunter e trenescha tar il club da canu da Cuira. En l'aua selvadia sa senta ella dapi onns da chasa. L'inspiraziun per il sport da canus ha ella da sia mamma, che gieva sezza sut la bandiera austriaca. Cuntrari ad ella na va Leni dentant betg en l'aua quieta, mabain en l'aua selvadia.
Gia en Svizra ha Leni Uffer cuntanschì resultats remartgabels en sia categoria da vegliadetgna. Ella ha dentant era gia pudì sa cumprovar sin plaun internaziunal. Als campiunadis mundials da canu da giuvenils en Frantscha l'onn passà ha ella gudagnà la medaglia da bronz en la categoria C1.
Questa gievgia, ils 24 da fanadur, ha Leni Uffer cumbattì cun 16 autras canutistas. En la cursa da qualificaziun ha ella pudì sa cumprovar ed è arrivada sin il 6avel plaz. Cunquai è ella sa qualifitgada cun in avantatg da radund 20 secundas per la cursa finala. En la cursa finala dal suentermezdi n'è la fortuna dentant betg propi stada da sia vart. La finala sa tschenta Leni Uffer sin il 10avel plaz.
Ins po adina emprender da quai ch'ins ha fatg fallà durant questas cursas.
RTR ha visità la canutista da 15 onns en il trenament d'enviern a Trin.
Il European Youth Olympic Festival è in eveniment polisportiv per giuvenils tranter 14 e 18 onns. L'ediziun da stad 2025 ha lieu dals 20 fin ils 26 da fanadur a Skopje. En 10 disciplinas da sport sa participeschan circa 4'000 atlets ed atletas da 48 pajais. La Svizra è represchentada cun in team da 90 persunas.
